Tv Gurra: Komuna e Kërçovës kundër kulturës shqiptare, VLEN pa zë !?

Reagim ndaj Komunës së Kërçovës për diskriminim ndaj kulturës shqiptare. Shqetësues qëndrimi inekzistent i koalicionit shqiptar VLEN.
Procesi i ndarjes së mjeteve për projektin “Kërçova – Qytet i Kulturës 2026” ka shkaktuar pakënaqësi të theksuar te disa shoqata dhe artistë shqiptarë. Pavarësisht kërkesës zyrtare të TV Gurra për informim me karakter publik, drejtuar Komunës së Kërçovës, përkatësisht kryetarit Aleksandar Jovanovski, kryetarit të Këshillit Ajhan Sulkoski dhe kryetarit të Komisionit për Kulturë Mihajlo Petreski, ende mungon transparenca e plotë mbi projektet e financuara, kriteret e vlerësimit dhe ndarjen konkrete të buxhetit prej rreth 10 milionë denarësh.

Sipas aplikuesve, shumica e projekteve shqiptare janë refuzuar, ndërsa ato të miratuara janë mbështetur me shuma minimale prej 20.000 deri në 50.000 denarë, të cilat konsiderohen të pamjaftueshme për realizim dinjitoz.
Disa përfitues po shqyrtojnë edhe mundësinë e kthimit të mjeteve, duke i cilësuar ato si simbolike.

Duke u bazuar në përbërjen e popullsisë në komunë, shoqatat vlerësojnë se projektet shqiptare duhet të përfaqësohen me mbi 50% të vlerës së përgjithshme të buxhetit kulturor. Megjithëse Komisioni për Kulturë thuhet se ka dhënë propozim pozitiv, mungesa e transparencës në kriteret e përzgjedhjes dhe niveli i ulët i financimit kanë ngritur dyshime serioze për trajtim të padrejtë ndaj kulturës shqiptare.
Heshtja e përfaqësuesve shqiptarë të VLEN ka thelluar edhe më tej pakënaqësinë dhe ndjenjën e mospërfaqësimit në opinionin publik.

/tvgurra