Rreth 70% e qytetarëve në Maqedoni përdorin telefon para gjumit ?

Rreth 70% e qytetarëve në Maqedoni përdorin telefon ose ekran para gjumit, ndërsa mbi 40% kanë pasur probleme me gjumin në tre muajt e fundit. Këto janë rezultatet e një ankete anonime online të realizuar nga Klinika Universitare e Psikiatrisë në periudhën 2–6 mars 2026 me 491 pjesëmarrës.

Sipas anketës, 63% flenë 5–7 orë në natë, 11,6% më pak se 5 orë dhe 22,8% 7–9 orë. Po ashtu, 44,6% dëshirojnë më shumë informacione ose mbështetje profesionale për përmirësimin e gjumit, ndërsa shumë prej tyre rrallë ndihen plotësisht të pushuar.

Shumica besojnë se gjumi ndikon në humor (71%), përqendrim (64%) dhe efikasitet në punë (63,3%). Nga Klinika e Psikiatrisë në Shkup theksojnë se këto rezultate tregojnë nevojën për më shumë informim dhe mbështetje për përmirësimin e cilësisë së gjumit.

Ekspertët paralajmërojnë se mungesa e gjumit ndikon në përqendrim, mendim dhe vendimmarrje, dhe nëse vazhdon për një kohë të gjatë mund të çojë në ankth dhe depresion.

Fokusi i këtij viti është promovimi i zakoneve të shëndetshme të gjumit tek fëmijët, pasi gjumi është thelbësor për rritjen, mësimin dhe stabilitetin emocional.

Si pjesë e muajit evropian për ndërgjegjësimin për gjumin organizohet edhe iniciativa “Dita me pizhama”, e cila synon të kujtojë se gjumi i mirë është bazë për shëndetin dhe mirëqenien.

/tv21