Mbi gjysmë miliardi euro për autostradën ende të papërfunduar Kërçovë – Ohër !?

Autostrada Kërçovë–Ohër, me gjatësi rreth 57 kilometra, ka kushtuar pothuajse 600 milionë euro, ndërsa deri tani janë paguar rreth 558 milionë euro, ose 93.3% e shumës së paraparë. Kjo do të thotë se një kilometër autostradë kushton mesatarisht 9.7 milionë euro, mbi 200 milionë më shumë se vlera fillestare prej 374 milionë eurosh.

Ndërtimi nisi në vitin 2014, por edhe pas 12 vjetësh projekti nuk është përfunduar. Deri tani janë përfunduar rreth 40 nga 57 kilometrat.
Aktualisht po punohet në sanimin e rrëshqitjeve të dheut dhe në mbrojtjen e shpateve përmes pyllëzimit, rrjetave gjeokompozite dhe spërkatjes me beton, me qëllim që segmenti të bëhet funksional dhe të lehtësohet udhëtimi drejt qendrës turistike të Ohrit.

Zvarritjet janë arsyetuar me mangësi në projekt, shpronësime të vonuara, probleme pronësore dhe mungesë të stafit e pajisjeve. Projekti është shoqëruar edhe me përplasje politike dhe hetime për dyshime për dëmtim të buxhetit të shtetit mbi 150 milionë euro, por rasti u parashkrua pa vendim përfundimtar.

/rel