Pas 12 vitesh dhe me një çmim dyfish më të lartë, autostrada Kërçovë–Ohër ende nuk po përfundon

Autostrada Kërçovë–Ohër, me gjatësi 57 km, filloi të ndërtohet në vitin 2014. Deri tani janë hapur rreth 40 km (Vrbjani–Botun dhe Klimeshtani–Ohër), ndërsa pjesa tjetër është ende në ndërtim. Qeveria e VMRO-DPMNE premtoi se autostrada do të përfundonte deri në fund të vitit 2026. Ministri i Transportit Aleksandar Nikoloski e përsëriti këtë premtim në korrik dhe shtator 2024, duke garantuar një autostradë funksionale deri atëherë.

Megjithatë, ndryshimet e fundit ligjore të miratuara në Kuvend parashikojnë një aneks të ri të marrëveshjes me kompaninë “Sinohydro”, i cili e shtyn afatin e përfundimit deri më 31 maj 2027. Aneksi përfshin edhe 186 milionë euro shtesë, duke e rritur koston totale të projektit në rreth 784 milionë euro, ose rreth 13.7 milionë euro për kilometër.

Ndërtimi i autostradës ka pësuar shumë vonesa që nga fillimi në vitin 2014, për shkak të problemeve me projektimin, shpronësimet dhe rrëshqitjet e dheut. Fillimisht projekti ishte planifikuar të kushtonte 374 milionë euro dhe të përfundonte në vitin 2018, por me ndryshimet dhe anekset e shumta afatet dhe kostot janë rritur ndjeshëm. Për këtë arsye, premtimi për përfundimin e autostradës deri në fund të vitit 2026 konsiderohet i parealizueshëm.

/ms