Vazhdon të dobësohet dollari amerikan ?

Dollari amerikan po vazhdon të humbasë vlerë kundrejt monedhave kryesore, duke ndjekur tendencën e vitit 2025, kur shënoi rënien më të madhe në gati një dekadë. Në vitin 2025 dollari u dobësua rreth 10 për qind, ndërsa në fillim të vitit 2026 ka rënë edhe 2,6 për qind të tjera.

Si pasojë, euro ka arritur për herë të parë që nga viti 2021 nivelin 1,20 dollarë, ndërsa janë forcuar edhe funta britanike dhe yeni japonez. Analistët e lidhin dobësimin e dollarit me pasigurinë e politikave të presidentit Donald Trump, por edhe me dëshirën e administratës së tij për një dollar më të dobët, që do të favorizonte eksportet amerikane.

Forcimi i euros ka ndikim të drejtpërdrejtë në ekonominë evropiane: eksportet bëhen më pak konkurruese, ndërsa importet më të lira. Sipas ekonomistëve, nëse kursi euro–dollar mbetet në nivelin aktual, rritja ekonomike e eurozonës mund të ngadalësohet.

Rritja e euros ka nxitur debat mbi një ndërhyrje të mundshme të Bankës Qendrore Evropiane, por shumica e ekspertëve vlerësojnë se luhatjet aktuale janë ende të moderuara dhe nuk kërkojnë masa urgjente.

/ms