Kërçovë: Morën rroga dhe nuk shkuan në punë ! Kallëzim penal kundër Fatmir Deharit

Ministria e Punëve të Brendshme ka ngritur kallëzim penal kundër ishkryetarit të Komunës së Kërçovës, Fatmir Deharit për keqpërdorim të detyrës dhe larje parash, me çka e ka dëmtuar buxhetin e komunës 130 mijë euro, raporton Poralb.mk.

NJPB Kërçovë ngriti kallëzim penal kundër F.D. (52) nga fshati Sërbicë i Kërçovës, për shkak të ekzistimit të dyshimit për vepër të kryer penale “keqpërdorim i detyrës dhe autorizimit zyrtar”, si dhe kundër F.A. (62) nga f. Zajas, A.N. (38) nga f. Sërbicë, H.B. (37) nga f. Cërvevc dhe B.S. (36) nga f. Strellcë, për vepër të kryer penale “pastrim parash dhe të ardhurash të tjera nga vepra e ndëshkueshme”.

“I denoncuari i parë F.D., në cilësinë e kryetarit të komunës së Kërçovës, në periudhën nga viti 2021 deri në vitin 2025, me vetëdije dhe me paramendim, ka vepruar në kundërshtim me dispozitat e Ligjit për Marrëdhëniet e Punës dhe duke mos vepruar në përputhje me Ligjin për Vetëqeverisje Lokale, ka lidhur kontratë pune me personat e tjerë të denoncuar. Më pas, me mosushtrimin e mbikëqyrjes së domosdoshme, me vetëdije u ka lejuar që të mos vinin në punë dhe t’u paguheshin rrogat, kompensimet dhe kontributet e tjera nga arka e komunës dhe pas skadimit të afatit ligjor nuk ua ka ndërprerë marrëdhënien e punës”, informoi Ministria e Brendshme.

Në këtë mënyrë, siç thonë nga MPB-ja, Dehari në periudhën e theksuar kohore, e ka dëmtuar buxhetin e Komunës së Kërçovës në shumën prej 130.000 eurosh dhe u ka lejuar të denoncuarve të tjerë të përfitojnë dobi materiale, nga të cilat, secili veçmas dhe në llogarinë e tij, kanë marrë shuma të ndryshme parash edhe pse ishin në dijeni se janë përfituar në bazë të veprës së kryer penale.

Ky është kallëzimi i katërt penal kundër Fatmir Deharit si kryetar komune në më pak se një vit.
Më 4 maj 2025 MPB ngriti kallëzim penal kundër Deharit për keqpërdorim të pozitës zyrtare duke dëmtuar buxhetin komunal me 4 milionë denarë.

Më 29 korrik 2025 MPB ngriti kallëzim ndaj Deharit pasi lejoi ngritjen e një deponie mbeturinash të paligjshme.
Më 25 nëntor 2025 MPB ngriti kallëzim ndaj Deharit për kryerjen e veprës penale “punë e pandërgjegjshme në detyrë”.

Kujtojmë se Dehari ri-kandidoi për kryetar të komunës së Kërçovës në zgjedhjet lokale 2025, por humbi nga kandidati i VMRO-së. Gjatë fushatës zgjedhore, ai u përmend në skandalin me materiale të përgjuara ku dëgjohet një zë i cili thuhet të jetë Dehari, të cilat janë me përmbajtje eksplicite, seksuale, korruptive, ofendime, sharje dhe të tjera.

/portalb