Faleminderim për Xhematin e Myftinisë së Kërçovës. Shkruan hoxha Imer Jusufi

“Ju jeni populli më i dobishëm, i ardhur për të mirën e njerëzve; të urdhëroni për të mirë dhe të ndaloni nga e keqja dhe të besoni në Allahun.”(Ali Imran, 3:110)
Të nderuar vëllezër dhe motra, xhematlinj të nderuar të xhamisë “Sulltan Bajazit” në Kërçovë, si dhe të fshatrave të Kërçovës dhe Plasnicës.

Para se gjithash, dua t’ju falënderoj për urimet dhe dëshirat tuaja të sinqerta që më keni shprehur me rastin e pensionimit tim, pas 35 vjetëve shërbim në mesin tuaj. Me këtë rast, dëshiroj t’ju drejtohem me disa fjalë nga Kur’ani Fisnik dhe hadithet e Muhamedit a.s., në lidhje me këtë moment të veçantë.

Allah xh.sh. në ajetin 110 të kapitullit Ali Imran thotë:
كُنْتُمْ خَيْرَ أُمَّةٍ – “Ju jeni populli më i dobishëm (më i mirë)…”
Dhe brenda këtij populli të mrekullueshëm, ju jeni xhemati i nderuar i Myftinisë së Kërçovës, e sidomos xhemati i xhamisë “Sulltan Bajazit”, ku kam pasur nderin të shërbej për 35 vjet si imam, hatib, vaiz dhe mualim.
Ky vlerësim nuk është thjesht një ndjenjë personale, por mbështetet në disa fakte të pamohueshme:
1. Ju i hapët zemrat dhe dyert e shtëpive tuaja dhe më pranuat si pjesëtar të familjeve tuaja, duke më shprehur ngrohtësinë shpirtërore dhe morale gjatë gjithë këtyre viteve shërbimi.

2. Më përkrahët dhe më ndihmuat në mënyra të ndryshme kur dikush tentonte të pengonte fillimin e mësimit të besimit islam (mektebit) në xhaminë tonë.
3. Më mbështetët moralisht dhe materialisht për organizimet dhe manifestimet fetare me nxënësit e mektebit.
4. Më ndihmuat kur dikush tentonte të më pengonte ose të më dëmtonte ekonomikisht.
5. Më mbështetët kur dikush tentonte të më pengonte të flas në gjuhën shqipe.

6. Ju përgjigjët thirrjes për të ndihmuar vëllezërit dhe motrat muslimane nga Bosnja dhe Hercegovina, të cilët ishin refugjatë në këto treva.
7. Ju ndihmuat vëllezërit dhe motrat nga Republika e Kosovës, duke iu hapur zemrat, shpirtin dhe shtëpitë tuaja.
8. Kontribuuat në mënyra të ndryshme për funksionimin e Universitetit të Tetovës, duke ndarë atë që kishit më të shtrenjtë, për të ndihmuar arsimin.

9. Dhat kontribut të madh gjatë vitit 2001, në kohën kur populli ynë përjetonte vështirësi dhe konflikt, dhe në shumë raste të tjera që vetëm Allahu i di.
Në përfundim, miq, shokë, dashamirë, familjarë dhe të gjithë xhematlinj të Myftinisë së Kërçovës, e sidomos të xhamisë “Sulltan Bajazit”, ku kam shërbyer si hoxhë për 35 vjet: nga zemra ju falënderoj për urimet, dëshirat dhe dhuratat tuaj me rastin e pensionimit tim. Lutem që Allah xh.sh. t’ju shpërblejë me të mirat më të mëdha, si në këtë botë, ashtu edhe në botën tjetër (Dunja dhe Ahiret).Me respect.

/ms