Mbi gjashtë mijë të huaj morën leje pune për në Maqedoni ?

Në vitin 2025, gjithsej 6.128 punëtorë të huaj morën leje për qëndrim të përkohshëm për shkak të punës në Maqedoninë e Veriut, trefish më shumë se në vitin 2020. Sektorët me kërkesën më të madhe janë ndërtimtaria, industria përpunuese, hoteleria dhe tregtia. Punëtorët nga Turqia vazhdojnë të dominojnë, por vitet e fundit është rritur ndjeshëm numri i punëtorëve nga Bangladeshi, Nepali dhe India.

Sipas Agjencisë së Punësimit, në vitin 2025 janë dhënë 8.509 mendime pozitive për leje pune, krahasuar me 3.227 në vitin 2020. Nga këto, më së shumti i përkasin shtetasve të Turqisë, Bangladeshit, Nepalit dhe Indisë. Pjesa më e madhe e punëtorëve angazhohen në Shkup, ndërsa të huajt janë gjithnjë e më të pranishëm në jetën e përditshme, veçanërisht në ndërtim dhe gastronomi.

Punëtorët nga vendet më të varfra vijnë kryesisht përmes agjencive ndërmjetësuese, ndërsa bizneset vendase theksojnë mungesën e fuqisë punëtore vendase për shkak të emigrimit. Megjithëse ka raste të largimit drejt vendeve të tjera evropiane, në vitin 2025 janë evidentuar vetëm 166 raste të tilla.

Kuota vjetore për punësimin e të huajve në vitin 2025 është 10.000 punëtorë, ndërsa me ndryshimet ligjore të miratuara, punëtorët në projekte strategjike mund të angazhohen edhe jashtë kësaj kuote.

/rel