Më shumë azilantë drejt Shqipërisë!

Qeveria italiane ka prezantuar një paketë të re masash për sigurinë publike, e cila ka ngjallur debat për shkak të ndikimit në të drejtat e emigrantëve, lirinë e protestës dhe balancën mes rendit dhe lirive civile. Paketa përfshin një dekret me efekt të menjëhershëm dhe një draftligj që do të diskutohet në Parlament.

Masat më të forta lidhen me emigracionin. Italia parashikon ndalimin e hyrjes së disa anijeve dhe transferimin e azilkërkuesve në vende të treta. Në këtë kuadër hyn edhe marrëveshja me Shqipërinë për dërgimin e migrantëve në qendrat e Shëngjinit dhe Gjadrit, një model që kritikët e cilësojnë si “eksternalizim” të azilit dhe rrezik për të drejtat e njeriut. Paketa zgjeron gjithashtu rastet e dëbimit, kufizon rolin e gjykatave dhe ul moshën e përfitimit nga skemat e veçanta të pritjes nga 21 në 19 vjeç.

Draftligji parashikon krijimin e “zonave të kuqe” në qytete me kriminalitet të lartë, me prani të shtuar policore, kamera sigurie dhe kontrolle të rrepta. Ashpërsohen dënimet për vjedhje, grabitje dhe dhunë mes të rinjve.

Një tjetër element i diskutueshëm është ndërhyrja ndaj të miturve 12–14 vjeç të përfshirë në dhunë, si dhe gjobitja e prindërve deri në 1.000 euro. Parashikohet ndalim i plotë i shitjes së thikave për të miturit dhe dënime deri në 3 vjet burg për mbajtje të paligjshme.

Për protestat, parashikohen kontrolle më të rrepta, gjoba të larta dhe masa kufizuese për personat e dhunshëm. Ndërsa qeveria e sheh paketën si përgjigje ndaj pasigurisë, kritikët paralajmërojnë rrezik për cenimin e lirive themelore dhe zhvendosjen e problemeve të emigracionit drejt vendeve të treta, përfshirë Shqipërinë.

/syri