Trump anulon mbi 100 mijë viza amerikane !

Departamenti i Shtetit ka anuluar mbi 100 mijë viza për shtetas të huaj gjatë vitit 2025, më shumë se dyfishi i anulimeve në vitin 2024, që ishte viti i fundit i administratës së Presidentit Joe Biden, raporton FOX News.

Kjo shifër përbën rekord historik, dhe vjen pas urdhrit ekzekutiv të Presidentit Donald Trump që në ditën e parë të mandatit për forcimin e verifikimit të shtetasve të huaj. Në vitin 2024, Departamenti kishte anuluar rreth 40 mijë viza.

Shumica e anulimeve kanë të bëjnë me vizat turistike dhe të biznesit, kryesisht për shkak të qëndrimit përtej afatit të lejuar.
Megjithatë, rreth 8,000 studentë dhe 2,500 punëtorë të specializuar kanë humbur gjithashtu statusin e tyre ligjor. Sipas një zëdhënësi të Departamentit, shumica e studentëve dhe punëtorëve që humbën vizat kishin pasur përplasje me ligjin.

Në mesin e punëtorëve të specializuar:
• 50% e anulimeve lidhen me arrestime për drejtim mjeti në gjendje të dehur,
• 30% për akuza për sulm fizik, dhunë apo ndalim të paligjshëm,
• ndërsa 20% për vepra si vjedhje, abuzim me fëmijë, përdorim dhe shpërndarje të drogave, mashtrim dhe përvetësim fondesh.

Afërsisht 500 studentë kanë humbur vizat për posedim dhe shpërndarje droge, ndërsa qindra punëtorë të huaj për shkak të dyshimeve për abuzim me fëmijë, tha një zëdhënës i Departamentit.
Në gusht të vitit 2025, administrata Trump njoftoi se kishte nisur rishikimin e të gjitha 55 milionë vizave të vlefshme amerikane.

Sekretari i Shtetit, Marco Rubio, ka zbatuar standarde më të ashpra për pajisjen me viza amerikane. Zëvendëszëdhënësi kryesor i Departamentit të Shtetit, Tommy Piggott, deklaroi se administrata do të vazhdojë qasjen e saj të fortë përmes një “qendre të verifikimit të vazhdueshëm”.

“Administrata Trump do të vazhdojë të vendosë Amerikën në radhë të parë dhe të mbrojë vendin nga shtetas të huaj që përbëjnë rrezik për sigurinë publike apo kombëtare,” u shpreh ai.

Departamenti i Shtetit ka forcuar gjithashtu kriteret për marrjen e vizave. Në nëntor 2025, Fox News Digital raportoi se administrata kishte rifilluar zbatimin e rregullit të “barrës publike”, duke refuzuar vizat për aplikantët që vlerësohen se mund të varen nga përfitimet sociale.

Ky rregull përfshin faktorë shëndetësorë – duke vendosur nën vëzhgim më të madh personat e moshuar dhe mbipeshë – si dhe njohuritë e gjuhës angleze, gjendjen financiare dhe nevojat e mundshme për kujdes afatgjatë.

/ina