Tv Gurra: Reagim nga Afaristi dhe mërgimtari Kërçovar Kastriot Iseini

Afaristi dhe mërgimtari Kastriot Iseini reagon ndaj shpifjeve: “Kërçova nuk fitohet në ditë zgjedhjesh, por mbahet gjallë çdo ditë nga shqiptarët e ndershëm” – tha ndër të tjera ai.
Reagimi i plotë:

“REAGIM PUBLIK…
Në radhë të parë, dua të shpreh respekt të thellë për çdo mërgimtar që la punën, familjen dhe udhëtoi mijëra kilometra për të ardhur e për të ushtruar të drejtën e votës në Kërçovë. Ata janë zemra e qytetit tonë – pa dallim partie, bindjeje apo krahu.

Nuk do të dëshiroja të bëja publike kontributet e mia, sepse gjithmonë kam besuar se vepra flet më shumë se fjala. Por, kur përballem me pavërtetësi që cenojnë dinjitetin tim personal dhe imazhin e bizneseve ku punojnë dhjetëra bashkëqytetarë të ndershëm, jam i detyruar të sqaroj disa fakte:

• TV Gurra – gjatë gjithë fushatës asnjëherë nuk ka transmetuar asnjë material politik që favorizonte palën tjetër. Kur zonja Jovanoska dha intervistën e saj gjatë balotazhit, ne nuk reaguam, sepse ishte periudhë para vendimit final!

• Swiss Ranch – gjatë fushatës ka mirëpritur mërgatën shqiptare nga Amerika, Evropa dhe Zvicra, ku janë mbajtur aktivitete kulturore, muzikore dhe shoqërore që e kanë nderuar emrin e Kërçovës. Madje, grupi “AVI Uskana” e nisi vargun e koncerteve të tyre nga Swiss Ranch, ku u mirëprit me respekt mërgata amerikane që qëndroi në hotel për tri javë rresht, pa kompenzim.
• Restoranti Dardania – është ofruar falas në çdo moment për AKI-në dhe për çdo institucion që ka pasur nevojë për zhvillimin e ndonjë aktiviteti zyrtar. Pa asnjë kusht.
Kjo është sa i takon bizneseve mia.

Ndërkaq si individ, unë dhe familja ime kemi ushtruar të drejtën tonë të votës me dinjitet dhe përgjegjësi qytetare. Lagjja jonë është e pastër nga çdo ndikim apo dyshim, dhe ne e kemi bërë detyrën tonë si çdo qytetar i ndershëm që e do Kërçovën.

Nuk kam kërkuar kurrë përfitim personal nga angazhimi publik apo nga puna ime në media e biznes.
Por nuk mund të lejoj që shpifjet e pavërteta të errësojnë punën, djersën dhe kontributin e një jete të tërë për qytetin që dua.

Kërçova nuk fitohet e as nuk humbet nga një ditë zgjedhjesh; Kërçova mbahet gjallë çdo ditë nga punëtorët, nga mërgimtarët, nga bizneset që punojnë për këtë tokë dhe që mbajnë familje shqiptare me bukë e dinjitet!
Kastriot Iseini TV Gurra | Dardania | Swiss Ranch” – u shpreh z. Iseini!

/tvgurra