Kërçovari Dr. Gazmend Mehmedi – pjesë e ekipit që realizoi operacionet e para me sistemin 3D. ne Shkup

Në Klinikën Universitare të Oftalmologjisë në Shkup, për herë të parë janë kryer ndërhyrje kirurgjikale në retinë dhe makulë duke përdorur sistemin modern NGENUITY®️ 3D Visualization System.

Gjatë dy seancave operative të muajit të kaluar u operuan gjashtë pacientë me sëmundje të retinës nga kirurgu vitreo-retinal, dr. Lukan Mishev nga Bullgaria. Në këtë proces morën pjesë dhe u trajnuan për këtë teknologji edhe mjekët e Klinikës: Doc. dr. Natasha Trpevska Shekerinov, Prim. dr. Gazmend Mehmedi dhe dr. Stefan Pandilov (specializant), të cilët në të ardhmen do t’i realizojnë vetë këto ndërhyrje në Shkup.

Kjo teknologji 3D zëvendëson okularët tradicionalë, duke ofruar pamje me rezolucion të lartë, perceptim më të thellë të strukturave retinale dhe mundësi për manipulim më të saktë gjatë operacionit. Një risi tjetër ishte përdorimi i angiografisë intraoperative me fluoresceinë, që mundëson vlerësim në kohë reale të qarkullimit vaskular të retinës gjatë ndërhyrjes.

Operacionet u transmetuan drejtpërdrejt përpara mjekëve të tjerë oftalmologë dhe specializantëve, duke dëshmuar edhe një herë se kjo Klinikë mbetet qendër udhëheqëse e arsimit, inovacionit dhe praktikës moderne oftalmologjike në vend.

/tvgurra