Gjermani, 50-vjeçari shqiptari paguan 1.140 euro në kufi për të mos shkuar në burg !

Sipas njoftimit të Policisë Federale Gjermane, ngjarja ka ndodhur mbrëmjen e së hënës, më 26 tetor, në pikën kufitare Elten, në autostradën A3, pranë qytetit Emmerich. Shqiptari po hynte në Gjermani nga Holanda, duke drejtuar një automjet me targa franceze, kur u ndalua nga policët kufitarë në kuadër të kontrolleve të përkohshme kufitare.Gjatë kontrollit, 50-vjeçari paraqiti një leje qëndrimi të lëshuar nga Sllovenia.

Mirëpo, pas verifikimit të të dhënave të tij në sistemin policor, rezultoi se ndaj tij ekzistonte një urdhërarrest i lëshuar nga Prokuroria e Osnabrückut.Sipas autoriteteve, urdhërarresti lidhej me një dënim të mëparshëm për hyrje të paligjshme në territorin gjerman, për të cilin shqiptari kishte ende një gjobë të papaguar prej 1.140 eurosh.

Për shkak të mospagesës së gjobës, ai rrezikonte të përfundonte në burg për 19 ditë.Megjithatë, 50-vjeçari e pagoi shumën e kërkuar drejtpërdrejt te Policia Federale, duke shmangur kështu burgimin.Pas përfundimit të procedurave policore, atij iu lejua të vazhdonte udhëtimin.Rasti është bërë publik të martën, më 27 tetor, nga Policia Federale Gjermane.

/Urgjent