Tv Gurra: VLEN hap shtabin zgjedhor në Zhubrinë – Limani: “Rruga përpara është e përbashkët”

Koalicioni VLEN vazhdon me ritëm të fuqishëm fushatën zgjedhore, duke hapur shtabin e radhës në fshatin Zhubrinë.
Në këtë takim mori pjesë edhe kandidati për kryetar të Komunës së Kërçovës, z. Fatmir Limani, i cili pas angazhimeve të shumta në diasporë, tashmë ka intensifikuar aktivitetet edhe në vend.

Ngjarja në Zhubrinë u cilësua si hap i rëndësishëm drejt organizimit më të mirë dhe forcimit të bashkëpunimit me banorët e këtij vendi mikpritës e punëtor.
Prania e qytetarëve dhe përfshirja e tyre aktive në diskutime dëshmuan se Zhubrina ka potencial të madh, njerëz të përkushtuar dhe vullnet për ndryshim.

Gjatë takimit u diskutuan çështje me prioritet për zhvillimin lokal, me theks të veçantë tek përmirësimi i infrastrukturës, krijimi i vendeve të reja të punës dhe rritja e mundësive për të rinjtë.

Në fund, Limani falënderoi banorët për besimin, idetë dhe përkrahjen e sinqertë, duke theksuar se rruga përpara është e përbashkët – me vizion të qartë dhe punë konkrete për një Zhubrinë dhe Kërçovë më të mirë.

/tvgurra