Alarm në Kërçovë – flakët afrohen pranë shtëpive, ndërhyrje urgjente !

Një vatër e madhe zjarri ka shpërthyer këtë pasdite në zonën midis fshatrave Çelopejcë dhe Miokazi, në afërsi të Kërçovës dhe Komunës së Vraneshnicës, duke rrezikuar banesat dhe zonat e banuara.

Sipas Qendrës për Menaxhim me Kriza (QMK), zjarri ka përfshirë një sipërfaqe të gjerë me shkurre dhe pyje, dhe është shumë afër shtëpive. Në terren po ndërhyjnë 35 ushtarë të ARM-së me tre automjete “Pinzgauer”, si dhe dy helikopterë të MPB-së dhe një helikopter i ARM-së për ndërhyrje ajrore.

Gjithashtu, janë dërguar dy automjete nga Brigada Zjarrëfikëse e Qytetit të Shkupit, si dhe mbështetje tjetër tokësore për të ndihmuar në izolimin e flakëve.

Autoritetet lokale kanë bërë thirrje për kujdes maksimal nga banorët, ndërsa kryetari i Kërçovës, Fatmir Dehari, ka deklaruar se “situata është alarmante” dhe ka kërkuar që qytetarët të shmangin çdo veprim që mund të shkaktojë zjarr.

/ms