Reagim nga zv/drejtori i EMV Rexhep Asani

Të dashur qytetar, me theks të veçant të dashur Kërçovar. Nuk desha të prononcohem lidhur me reagimet që bën opozita në Kërçovë lidhur me Kombinatin e Osllomesë, por nuk desha të ngel borxh për ta informuar qytetarin lidhur me dezinformatat që po lanson opozita e tanishme dhe pushteti i deri para një viti. Ata kanë harruar apo si duket kanë përpunuar një strategji se Ju të dashur qytetar duhet të harroni keqpërdorimet e tyre deri para një viti, rrjesht 23 vite keqpërdorim dhe ata tani të luajnë rolin e engjujve.

Është e vërtetë se unë, Agim Sadiku, Fatmir Limani dhe shumë shokë tjerë kemi protestuar në kohën e tyre për ndotje nga elektrana, por kemi protestuar kundër ndotjes kancerogjene si dhe kundër hedhjes së mbeturinave të komunalecit në gërmimin e thellë të xeherores. Mbeturina këto që gjatë kalbëzimit bëjnë ndotjen e ujrave nëntokësor dhe çlirojnë gazin e cijanidit.

Dhe për këto protesta jemi krenar. Kësi veprimesh më nuk janë të mundura në qeverisjen tonë. Si që është bërë e ditur tani më në opinion, prokuroria ka ngritur dy raste për ish menaxhmentin e kombinatit. Rasti i mazutit kancerogjen si dhe rasti i aditivëve kancerogjene. Për këto kemi protestuar ne.

Tani, e dimë të gjithë se jemi në fazën e konsolidimit të të gjithë sistemit energjetik të vendit, duke investuar e modernizuar atë që e trashëguam prej tyre. Sikur të kishin punuar me ndershmëri dhe të paktën po të kishin investuar minimalisht nga 10000 euro në muaj për elektranën për 23 vite, sot do kishim një situatë tjetër. Po marr guximin dhe po bëj publik një fakt. Janë të evidentuara dy remonte të elektranës të cilat nuk janë bërë realisht asnjëherë. Remonte në letër, paratë në xhepat e tyre. Nuk po e shohin që çdo ditë po përballen me prokurori? Akoma duan ti besojë kush se ata vërtet qenkan të shqetësuar për ambientin dhe shëndetin publik?!!!

Edhe diçka, me qëllim kanë mbuluar rezerva të mëdhaja të thëngjillit me fotovoltaikët që në vend të tyre të blejnë thëngjillë me çmime të majme të faturuara EMV kurse përqindjet familjeve të tyre. Prapë duan të na shesin dushk për gogla. Unë si zv.drejtor i përgjithshëm, me përgjegjësinë më të madhe po ju bëj me dije se: as po përdorim materiale kancerogjene dhe nën normat e lejuara ligjore të shtetit, as po furnizohemi me thëngjill me çmime stratosferike për përfitime vetjake.

Po bëjmë maksimumin për të siguruar energji me këto kapacitete të trashëguara, po investojmë me shumë seriozitet në këto kapacitete, po mundohemi të vejmë disciplinën në punë dhe më e rëndësishmja po punësojmë edhe shumë të rinjë që do krijojnë jetën dhe perspektivën këtu në vendin e vet pa qenë nevoja të emigrojnë dhe pa qenë nevoja të japin ryshfet për vendin e punës, ashtu si e ndërtuan ata si praktikë.

Ky është zotimi ynë. Prandaj do ju lutem që mos ua vërni veshin atyre që dolën nga pushteti sepse nuk kanë dertin tuaj, kanë hallin se ju iku mjalti nga goja. Kombinati është për popullin, aty do punojmë, aty do prodhojmë. Më tepër nuk do merrem me ata që po mashtrojnë. Le të thonë çfar të duan, njerëzit në Kërçovë i njohin dhe i dinë të bëmat e tyre. Kërçovarë të rrini të qetë, do ketë punë, do ketë mirëqenje, nuk do ketë vjedhje, nuk do ketë kancer. Ka dallim të madh ndërmjet nesh dhe atyre.

Me shumë respekt për qytetarët, me shumë përgjegjësi para jush,
Ark.Rexhep Asani, zv.drejtor i përgjithshëm i EMV.

/ms