Shtëpia e pensionistëve në Kërçovë me ndërtesë të vjetër dhe kushte të vështira..(VIDEO)

Kjo ndërtesë shërben si shtëpi për të moshuarit dhe klub pensionistësh në Kërçovë. Aktualisht, këtu jetojnë 10 të moshuar. Qëndrimi në këtë shtëpi nuk është i përhershëm, por zgjat deri në momentin kur pensionistët janë në gjendje të kujdesen vetë për veten. Ata paguajnë një tarifë mujore prej 1,200 denarësh, si dhe shpenzimet e energjisë elektrike që konsumojnë.

“Kemi dhjetë banues, sepse kjo shtëpi nuk është për qëndrim të përhershëm, por për një periudhë të caktuar derisa pensionistët mund t’i shërbejnë vetes dhe numri është i limituar në 10 banues”, tha Dushan Ristoski-kryetar i Shoqatës së Pensionistëve Kërçovë.
Kushtet nuk janë të mira, pasi ndërtesa është e vjetër. Në këtë shtëpi ka dhjetë dhoma, por vetëm dy banjo për meshkuj dhe një për femra

“Kushtet janë shumë të këqija, sepse ndërtesa është e vjetërsuar. Kemi dy kate, ka vetëm nga një banjo, kështu që ne mundohemi nëpërmjet vetëqeverisjes lokale dhe donatorëve, megjithatë shumë vështirë arrimë deri tek donacionet që t’i përmirësojmë kushtet për të jetuar, por edhe pse kushtet janë të këqija, kemi banorë që nuk kanë ku tjetër të shkojnë”, theksoi Dushan Ristoski-kryetar i Shoqatës së pensionistëve Kërçovë.

Në këtë shtëpi ndodhet edhe një kafene për pensionistët. Megjithatë që nga shpërthimi i virusit korona, ky klub nuk funksionon më. Kjo ka ndikuar negativisht te shoqata, pasi të ardhurat nga shitja e kafesë dhe pijeve shkonin për mirëmbajtjen e shtëpisë.

Pensionistët marrin pjesë në aktivitete të ndryshme, si shëtitje, aktivitete sportive dhe gara. Megjithatë, është e qartë se kjo shtëpi pensionistësh ka nevojë për një rinovim tërësor.

VIDEO:

/tv21