Kush e ndërtoi Sallën e Sportit në Zajaz..!? (VIDEO)

Ndërtimi i sallës së sportit në SH.F.Q “Rexhë Rushit Zajazi” po del të jetë një labirint i vërtetë.
Kujtojmë se në kronikën e fundit thamë se po presim përgjigje nga Ministria e Vetëqeverisje Lokale, duke u bazuar në atë se të gjitha informacionet në terren flisnin se sallën e ka ndërtuar po kjo ministri. Por pas përgjigjes përfundimtare nga Ministria se tek ata nuk ka asnjë dokument në lidhje me ndërtimin e kësaj salle, filluam të kontaktojmë persona fizik të përfshirë në këtë projekt.

Ajo që është për t’u habitur është se informacionet më të fundit janë se salla është ndërtuar me fonde të BE-së, gjë të cilën nuk e ka përmendur askush nga institucionet ose personat që kemi kontaktuar deri më tani. Nga ajo që mësoi TV21, faza e parë ka filluar në gusht të vitit 2011 dhe ka përfunduar në korrik të vitit 2012.

Për gjetjen e ndonjë dokumenti të mundshëm kontaktuam zyrat e BE-së në Shkup nga të cilët presim një qëndrim zyrtar se a janë apo jo financues të këtij projekti dhe a posedojnë ndonjë dokumentacion.
Përgjigje ende po presim.

TV21 gjatë javës disa herë është munduar të komunikojë me kadastrën në Kërçovë por këtu askush nuk e kap telefonin.
E për t’u vërtetuar se diçka nuk shkon me këtë sallë, që mbi 12 vite qëndron e mbyllur, ne nëpërmjet burimeve tona siguruam qasje në Kadastër për të parë nëse figuron objekti. Doli ajo që prisnim, salla e sportit nuk është e evidentuar as në Kadastër dhe ende ekziston objekti i vjetër i shkollës ku tani është e ndërtuar salla.

Drejtuesit e të dikurshmes Komunë e Zajazit me këmbëngulje dhe të bindur thonë që salla është në rregull dhe se dokumentacionin për sallën e kanë dërguar në Komunën e Kërçovës në kohën kur komunat u bashkuan. Por nga Komuna e Kërçovës mohojnë kategorikisht pasjen e ndonjë dokumenti për këtë sallë.
Informacionet e lartpërmendura flasin për fazën e parë të sallës, ndërsa për fazën e dytë ende jemi në kërkim e sipër.

VIDEO:

/tv21