Kërçovë, bukë falas për gjithë banorët e fshatit Cërvicë gjatë Ramazanit

Rastin e ka njoftuar profesori, Arbër Çeliku nga fshati Cërvicë:

“Falënderim publik për humanistin anonim”

Cërvica është njëri ndër fshatrat më të bukur të Kërçovës, ka rreth 500 shtëpi (secila më e bukur se tjetra) dhe mbi 2200 banorë (mbi 70%) në kurbet, infrastrukturë të rregulluar në çdo aspekt (pushteti qendror dhe ai lokal ende nuk kanë investuar asnjë denar, mbase shkaku i mospasjes së nevojës për këtë gjë), por edhe njerëz shumë bujarë dhe humanistë të pashoq.

Sot, shkova të marr bukë te shitorja në fqinjësinë time, dhe pronarja më tha se buka nuk paguhet, dmth për Ramazan jepet falas.

Cila është arsyeja, më tha një person, i cili dëshiron të mbetet anonim, i ka paguar të gjitha bukët për fshatarët deri në përfundim të Ramazanit. Kushdo qoftë ai, unë desha ta falënderoj përzemërsisht për këtë akt kaq human dhe Zoti e shpërbleftë me gjitha të mirat e kësaj bote!

Vendi ynë nuk ka vetëm politikanë hajdutë dhe të prishur, që shesin veten dhe kombin për para, interes dhe pushtet, por ka edhe njerëz fisnikë, humanë dhe filantropë të dëshmuar…”.

/lajmpress