Nasradin Hoxha dhe gjykimi..!?
Një mbrëmje, dy burra që ishin në debat të nxehtë, shkuan te Hoxhë Nasradini për ta zgjidhur mosmarrëveshjen e tyre. Secili nga burrat mendonte se e kishte drejt.
I pari foli gjatë dhe i shpjegoi të gjitha argumentet e tij, duke shpresuar se Nasradini do ta mbështeste.
Kur mbaroi së foluri, Nasradini tha: “Mirë e ke.”
Burri tjetër, i nervozuar, tha: “Hoxhë, prit një herë, se nuk i ke dëgjuar arsyet e mia!” Pastaj nisi të shpjegojë edhe ai me hollësi versionin e tij, duke shpresuar se do të fitonte mbështetjen e Nasradinit.
Kur edhe ky burrë përfundoi së foluri, Nasradini i tha: “Edhe ti mirë e ke.”
Ndërkohë, gruaja e Nasradinit, që po dëgjonte nga brenda shtëpisë, doli jashtë dhe tha e zemëruar: “Si është e mundur, Nasradin, që të dy të kenë drejt?
Nuk ka kuptim, s’mund të jenë të dy të drejtë njëkohësisht!”
Nasradini e vështroi gruan dhe i tha me qetësi: “Edhe ti mirë e ke!”
/ms
