Zvicër: AI po përhapet me shpejtësi !
Përdorimi i inteligjencës artificiale po rritet me shpejtësi në Zvicër, ndërsa rrjetet sociale mbeten pjesë e përditshmërisë. Këto janë gjetjet kryesore të studimit Digimonitor 2026, realizuar nga WEMF për Shoqatën Zvicerane për Mediat Elektronike (IGEM).
Sipas studimit, rreth dy të tretat e të anketuarve përdorin rrjetet sociale çdo ditë, ndërsa 90% të paktën herë pas here. Përdorimi ditor është rritur lehtë, sidomos te grupmoshat më të vjetra.
Instagram, Snapchat dhe TikTok përdoren më shumë se platformat me përmbajtje kryesisht tekstuale, si Threads dhe X. Argëtimi mbetet arsyeja kryesore, por mbi gjysma e përdoruesve marrin edhe lajme përmes rrjeteve sociale. Platformat po shfrytëzohen gjithnjë e më shumë edhe për kërkimin dhe blerjen e produkteve.
Rritje e madhe e përdorimit të AI-së
Përdorimi i inteligjencës artificiale është dyfishuar që nga viti 2024, nga 40% në 80%. Pothuajse një e treta e popullsisë e përdor AI-në çdo ditë. Te meshkujt e moshës 15–24 vjeç, kjo shifër arrin në 52%.
ChatGPT kryeson bindshëm dhe përdoret pothuajse dy herë më shumë se Gemini ose Copilot. Claude dhe AI-ja e Meta-s arrijnë rreth 10%, ndërsa Mistral vetëm 3%.
AI-ja përdoret kryesisht për përpunimin e teksteve, përkthime dhe kërkimin e informacionit. Rreth 40% e të anketuarve përdorin chatbotë edhe për këshilla gjatë blerjeve, krahasuar me vetëm 6% dy vite më parë.
Rezultatet duhen interpretuar me kujdes
Digimonitor nuk mat minutat reale të kaluara në internet, por vetëm nëse një shërbim përdoret çdo ditë, çdo javë ose herë pas here. Prandaj, është e mundur që rrjetet sociale të përdoren çdo ditë, por për një kohë më të shkurtër.
Studimi bazohet në një sondazh online me rreth 2 mijë persona të moshës 15–75 vjeç dhe përfaqëson afërsisht 6.4 milionë përdorues të internetit në Zvicër.
Megjithëse rreth 40% e zviceranëve i konsiderojnë rrjetet sociale si barrë, ky qëndrim kritik ende nuk ka sjellë një rënie të dukshme të përdorimit. Ajo që nis si argëtim, mund të shndërrohet gradualisht në varësi.
/albinfo
