Paraqiti biletë kthimi të falsifikuar! Shqiptarit i refuzohet hyrja në Gjermani

Sipas Policisë Federale gjermane, ngjarja ka ndodhur të hënën, më 12 tetor, kur i riu kishte mbërritur në aeroportin e Dortmundit me një fluturim nga Tirana. Rreth orës 08:40, gjatë kontrollit kufitar, 20-vjeçari kishte paraqitur pasaportën e tij shqiptare. Për të verifikuar nëse i plotësonte kushtet për hyrje në Gjermani, zyrtarët policorë i kishin kërkuar, ndër të tjera, edhe biletën e kthimit.

Mirëpo, gjatë kontrollimit të dokumentit, policia kishte konstatuar se bileta e paraqitur ishte e falsifikuar. Pas këtij konstatimi, i riu ishte njoftuar për të drejtat e tij, ndërsa kishte zgjedhur të mos jepte deklaratë lidhur me dyshimet.

Policia Federale vendosi t’ia refuzonte hyrjen në Gjermani dhe urdhëroi kthimin e tij në Shqipëri.Pasi kishte paguar një shumë si garanci financiare për procedurën, 20-vjeçari ishte kthyer me aeroplan në Tiranë rreth orës 15:30, po atë ditë. Kështu, vetëm rreth shtatë orë pas mbërritjes në aeroportin gjerman, shtetasi shqiptar ishte nisur sërish drejt Shqipërisë. Policia Federale ka bërë të ditur se lidhur me rastin ka nisur hetimet.

/Urgjent