“Zemrat pas Maleve” bashkon shqiptarët në Zyrih – letërsi, besë dhe kujtesë kombëtare

Në Konsullatën e Republikës së Kosovës në Zyrih u zhvillua një mbrëmje e veçantë kushtuar letërsisë, historisë, kulturës dhe kujtesës shqiptare, me rastin e promovimit të romanit “Zemrat pas Maleve”, të autorit kërçovar Blerim Ramadani.

Në këtë aktivitet morën pjesë një numër i madh kërçovarësh që jetojnë dhe veprojnë në Zvicër, si dhe personalitete nga fusha e artit, kulturës dhe letërsisë.
Pas promovimit, Konsullata kishte përgatitur një koktej për të pranishmit, duke e kthyer mbrëmjen në një takim të ngrohtë mes kulturës, letërsisë dhe mërgatës shqiptare.

Një falënderim i veçantë iu drejtua Konsullatës dhe z. Vigan Berisha për mikpritjen dhe pritjen e ngrohtë. Gjatë mbrëmjes, ai e cilësoi Konsullatën si “shtëpinë e të gjithë shqiptarëve”, një mesazh që u prit me respekt nga të pranishmit.

Megjithatë, në një aktivitet ku Kërçova ishte kaq e pranishme dhe ku promovohej vepra e një autori nga Kërçova, ra në sy mungesa e Ambasadorit të Maqedonisë së Veriut në Zvicër, i cili gjithashtu është me origjinë nga Kërçova.

Një mbrëmje e bukur për kulturën shqiptare, por edhe një mungesë që ngre pikëpyetje: sa duhet të jetë e pranishme diplomacia jonë në aktivitete që bashkojnë komunitetin, promovojnë autorët shqiptarë dhe ruajnë kulturën e kujtesën kombëtare?

/tvgurra