U promovua vepra “Zemrat pas Maleve” e autorit Blerim Ramadani

Në hapësirat e Konsullatës së Përgjithshme të Republikës së Kosovës në Cyrih, u mbajt promovimi i romanit “Zemrat pas Maleve”, të autorit Blerim Ramadani, një vepër e frymëzuar nga një ngjarje e vërtetë e Luftës së Dytë Botërore.

Aktivitetin e hapi Shefi i Misionit, z. Vigan Berisha, i cili përshëndeti të pranishmit dhe theksoi rëndësinë e promovimit të krijimtarisë letrare, veçanërisht të veprave që trajtojnë ngjarje historike dhe kontribuojnë në ruajtjen e kujtesës kolektive. Të pranishmëve iu drejtua gjithashtu Zëvendësambasadorja e Republikës së Kosovës në Bern, znj. Shukrije Ramadani.

Në vijim, z. Bardhec Berisha, z. Tonin Nikolli dhe z. Bujar Salihu, nga Shoqata e Krijuesve Shqiptarë në Zvicër, folën për veprën, përmbajtjen dhe dimensionin e saj letrar e historik. Ndërkaq, autori Blerim Ramadani ndau me të pranishmit rrugëtimin e krijimit të romanit dhe sfondin historik mbi të cilin është ndërtuar rrëfimi.

Romani “Zemrat pas Maleve” sjell në vëmendje një ngjarje të vitit 1944, kur dy aviatorë amerikanë, pas rrëzimit të një bombarduesi B-24 Liberator në malet e Bistrës, u strehuan dhe u mbrojtën nga shqiptarët e zonës. Në qendër të rrëfimit qëndron Besa, e trajtuar si shprehje e humanizmit, besnikërisë dhe sakrificës në rrethana lufte.
Mbrëmja u përmbyll me bashkëbisedim me autorin dhe të pranishmit mbi veprën dhe historinë.

/ts