Të kapi radari në Zvicër? Këto janë rastet kur mund t’i shpëtosh dënimit !

Nëse një radar ju kap duke vozitur mbi kufirin e lejuar në Zvicër, zakonisht pason gjobë ose masa të tjera, varësisht nga shkelja.
Por a mund të justifikohet shpejtësia e tepërt?

Defekti i shpejtësimatësit nuk mjafton
Në vitin 2022, një shofer u kap në autostradën A13 duke vozitur 136 km/h në një zonë me kufizim 100 km/h. Ai tha se shpejtësimatësi ishte me defekt, por gjykata nuk e pranoi arsyetimin, pasi duhej ta kishte kuptuar se po lëvizte shumë shpejt.

Po në rast emergjence?
Edhe një emergjencë personale nuk e justifikon automatikisht tejkalimin e shpejtësisë. Në një rast në Ticino, një shofer me probleme akute shëndetësore voziti 124 km/h në zonë 80 km/h. Gjykata Federale vlerësoi se ai mund të kishte ndaluar dhe nuk duhej të rrezikonte të tjerët.

Vetëm në raste shumë të jashtëzakonshme, sidomos kur rrezikohet jeta ose shëndeti, mund të merret parasysh një justifikim.

Kufizimi vlen menjëherë pas tabelës
Kufiri i ri i shpejtësisë hyn në fuqi pikërisht nga vendi ku ndodhet tabela. Nuk ka automatikisht disa metra tolerancë për të ulur shpejtësinë.

Jo çdo shkelje hyn në regjistrin penal
Tejkalimet e zakonshme nuk çojnë automatikisht në regjistrim penal. Pasojat bëhen më serioze kur tejkalimi konsiderohet shkelje e rëndë e rregullave të trafikut.

Kujdes me paralajmëruesit e radarëve
Në Zvicër ndalohen pajisjet dhe funksionet GPS që paralajmërojnë për radarët. Shkelja mund të sjellë gjobë dhe sekuestrim të pajisjes.
Pra, nëse ju kap radari, një “arsye e mirë” nuk mjafton domosdoshmërisht për të shmangur gjobën. Në raste serioze, këshillohet konsultimi me një jurist.

/albinfo