Syarta Saliju Osmani kërkon transparencë dhe trajtim të barabartë për ndërtimin e objekteve nga Kryetari I Komunës.

Këshilltarja komunale Syarta Saliju Osmani ka kërkuar nga kryetari i Komunës së Kërçovës të publikojë lejen e ndërtimit dhe dokumentacionin përkatës për kishën ortodokse “Shën Jovan Krstitel” në fshatin Knezhinë, ku së fundmi u vendos gurthemeli. Ajo thekson se respekton të drejtën e çdo komuniteti fetar për të ndërtuar objekte kulti, por kërkon që çdo ndërtim të realizohet në përputhje me ligjin dhe procedurat e parapara. Sipas saj, duhet të ketë standarde të njëjta për të gjithë, duke ngritur edhe çështjen nëse komuniteti mysliman do të trajtohej njësoj në rast të një kërkese të ngjashme. “Ligji ose vlen për të gjithë, ose nuk vlen për askënd”, ka deklaruar Saliju Osmani, duke kërkuar transparencë dhe llogaridhënie institucionale.

Ne postimin e saj shkruan:
Transparencë dhe barazi, jo privilegje!
Kryetari i Komunës dje publikoi pjesëmarrjen e tij në vendosjen e gurthemelit për ndërtimin e kishës ortodokse “Shën Jovan Krstitel (Gjon Pagëzori)” në fshatin Knezhinë, duke e cilësuar këtë si një ngjarje të rëndësishme shpirtërore dhe shoqërore.

Duke respektuar plotësisht të drejtën e çdo komuniteti fetar për të ndërtuar objekte kulti dhe respektuar ndjenjat fetare të të gjithë qytetarëve, publiku ka të drejtë të dijë nëse për këtë objekt është lëshuar leja përkatëse e ndërtimit në përputhje me ligjin.
Çdo ndërtim, pavarësisht karakterit të tij fetar, duhet të realizohet në përputhje me procedurat ligjore dhe me dokumentacionin përkatës.

Sipas dispozitave ligjore konkretisht dispozitave të ligjeve:
Ligji për Ndërtim ku çdo objekt ndërtohet vetëm me leje ndërtimi dhe dokumentacion përkatës.
Ligji për trajtimin e objekteve të ndërtuara pa leje ku rrjedhimisht ndërtimet pa procedura të rregullta nuk mund të trajtohen ndryshe sipas përkatësisë së investitorit.

Ligji për pozitën juridike të kishave, bashkësive fetare dhe grupeve religjioze ku garanton lirinë fetare, por nuk i përjashton bashkësitë fetare nga respektimi i ligjeve të shtetit.
Ligji për Pronësinë dhe të Drejtat e tjera Sendore ku rregullon të drejtat mbi pronën dhe mbron pronën shtetërore nga uzurpimi.

Nëse dikush ndërton në tokë shtetërore pa pëlqimin e shtetit, ky veprim konsiderohet uzurpim i paligjshëm i pronës shtetërore. Shteti (përmes Avokatit të Shtetit) ka të drejtë të kërkojë lirimin e menjëhershëm të pronës dhe dëmshpërblim për shfrytëzimin e paligjshëm të saj.
PËR HIRË TË TRANSPARENCËS, e ftojmë publikisht kryetarin e komunës që, në emër të transparencës dhe llogaridhënies, që përveç fotove të promovimit të publikojë edhe lejen e ndërtimit dhe dokumentacionin përkatës për këtë projekt.

Pas publikimit të lejes dhe dokumentacionit vijon një pyetje e thjeshtë: nëse një objekt fetar mund të ndërtohet në pronë shtetërore me respektim ose pa respektim të procedurave të nevojshme, a do të vlente i njëjti standard për këdo tjetër?
Si qytetare myslimane dhe bartëse e funksionit publik këshilltare komunale, pyes a do të kishte të njëjtin trajtim edhe komuniteti mysliman nëse do të kërkonte të ndërtonte një xhami në pronë shtetërore, duke respektuar të gjitha procedurat dhe lejet e parapara me ligj?

E DI QË JO! Sepse Myftinija e Kërçovës një kërkesë të tillë veç më e ka inicuar dhe ende nuk ka aprovim!
Ne nuk kërkojmë privilegje dhe as përjashtime. Kërkojmë vetëm atë që garanton Kushtetuta dhe ligji: standarde të barabarta për të gjithë.
Ligji ose vlen për të gjithë, ose nuk vlen për askënd.
Duam transparencë dhe trajtim të barabart, asgjë më tepër!

PS. Nuk e kisha në plan t’i drejtohesha më kryetarit të komunës me pyetje publike përmes postimeve, sidomos pas ofendimit që më është bërë para dy javës nga ana e tij. Megjithatë, mungesa e transparencës më detyron që, në cilësinë e këshilltares komunale dhe përfaqësuese e qytetarëve, të kërkoj përgjigje për çështje me interes publik.

/tvgurra