Sqarim për publikun! Shkruan Ajhan Sulkovski

Në ditët e fundit janë bërë një sërë deklaratash dhe interpretimesh politike lidhur me votimet dhe vendimet e marra në Këshillin Komunal të Kërçovës, të cilat përmbajnë akuza të pabaza dhe përpjekje për të krijuar perceptime të rreme para opinionit publik.

Si kryesues i Këshillit Komunal dhe si këshilltar i zgjedhur nga qytetarët e Kërçovës, ndiej obligim të sqaroj se çdo vendim që është shqyrtuar dhe votuar në Këshill është bazuar në procedura të rregullta, kritere të përcaktuara dhe baza të qarta ligjore.

Institucionet nuk mund dhe nuk duhet të funksionojnë mbi baza emocionale, partiake apo etnike, por mbi ligjin, profesionalizmin dhe interesin publik.
Përzgjedhjet e bëra në ndërmarrjet publike, komisionet dhe programet komunale nuk janë rezultat i preferencave personale, por i procedurave të parapara me ligj dhe i vlerësimeve të organeve kompetente.

Çdo përpjekje për t’i paraqitur këto procese si veprime kundër ndonjë komuniteti apo grupi politik është e pasaktë dhe nuk i shërben interesit të qytetarëve.
Po ashtu, hedh poshtë tentativat për të vënë në dyshim përfaqësimin tim politik apo përkushtimin tim ndaj qytetarëve që më kanë besuar mandatin.

Gjatë gjithë angazhimit tim publik kam vepruar me përgjegjësi, transparencë dhe respekt ndaj të gjitha komuniteteve që jetojnë në Kërçovë, pa dallim etnie, feje apo bindjeje politike.
Kërçova ka nevojë për dialog, bashkëpunim dhe zgjidhje konkrete për sfidat e qytetarëve, e jo për retorikë përçarëse dhe sulme personale.

Besoj se debati politik duhet të zhvillohet mbi argumente, fakte dhe vizion për zhvillimin e komunës, ndërsa qytetarët meritojnë të vërtetën dhe jo interpretime të motivuara politikisht.
Do të vazhdoj të ushtroj detyrën time me përgjegjësi të plotë, në përputhje me ligjin dhe në shërbim të interesit publik të të gjithë qytetarëve të Kërçovës.

/ms