Më shumë nxënës nga Kërçova po e nisin klasën e parë në Perëndim se në vendlindje

Kërçova po përballet me një realitet demografik gjithnjë e më shqetësues: një numër i konsiderueshëm i fëmijëve kërçovarë po e nisin klasën e parë në vendet e Perëndimit, në vend që të ulen në bankat shkollore në vendlindje.

Kërçova është një nga qytetet me numër të madh të mërgimtarëve, veçanërisht në Shtetet e Bashkuara të Amerikës, Zvicër, Gjermani dhe vende të tjera evropiane.
Sipas të dhënave joformale të përcjella nga shoqata të diasporës kërçovare, çdo vit një numër i konsiderueshëm i fëmijëve nga familjet e Kërçovës regjistrohen për herë të parë në shkollë jashtë vendit.

Kjo tregon se rënia e numrit të nxënësve në shkollat e Kërçovës nuk mund të shpjegohet vetëm me uljen e lindjeve. Një pjesë e fëmijëve që mungojnë në statistikat lokale tashmë jetojnë me familjet e tyre në diasporë.

Pra, problemi nuk është vetëm se po lindin më pak fëmijë, por edhe se fëmijët dhe familjet po largohen nga vendlindja. Çdo klasë e parë që hapet në Perëndim është një tregues i emigrimit dhe një tjetër sinjal për zbrazjen demografike të Kërçovës.

/tvgurra