Shqiptarët e Kërçovës pa përfaqësim në delegacionet zyrtare !

Këshilltari I Komunës së Kërçovës z. Kujtim Kasami ka reaguar se Shqiptarët e Kërçovës vazhdojnë të përballen me mungesë përfaqësimi, si në nivel qendror, ashtu edhe në nivel lokal.
Një nga shqetësimet që ngrihet vazhdimisht lidhet me përbërjen e delegacioneve zyrtare gjatë takimeve që kryetari i Komunës zhvillon me ambasadorë dhe përfaqësues diplomatikë.

Edhe më herët kam reaguar për mungesën e transparencës në këto takime, pasi nuk ftohen mediat lokale për t’i përcjellë ato dhe as këshilltarët komunalë nuk njoftohen paraprakisht.

Sipas këtij shqetësimi, në delegacionet zyrtare nuk përfshihet asnjë përfaqësues shqiptar, pavarësisht se shqiptarët përbëjnë një pjesë të rëndësishme të popullsisë së Komunës së Kërçovës.
Sipas të njëjtit shqetësim, edhe në takimin e sotëm të kryetarit të Komunës me ambasadoren e Kinës nuk ishte i pranishëm asnjë përfaqësues shqiptar në delegacionin zyrtar.

Përfaqësimi i barabartë i të gjitha komuniteteve dhe transparenca institucionale janë elemente të rëndësishme të një qeverisjeje demokratike. Përfshirja e të gjitha komuniteteve në takimet zyrtare dhe informimi i rregullt i mediave lokale dhe i këshilltarëve komunalë do të kontribuonin në pasqyrimin e karakterit shumetnik të Komunës së Kërçovës dhe në rritjen e besimit të qytetarëve ndaj institucioneve lokale.

/tvgurra