Shabani School of Music: nga Amerika e Kanadaja në Evropë – me prezantim në Konferencën YMTE 2026, Oslo, Norvegji
Një risi në edukimin muzikor, rezultat i rreth dhjetë viteve kërkim, zhvillim pedagogjik dhe zbatim në praktikën mësimore nga pedagogu kërçovar Dr. Afrim Shabani, do të prezantohet këtë vjeshtë në një konferencë të specializuar evropiane për edukimin muzikor parauniversitar dhe zhvillimin e talenteve të reja.
“The Reflective Studio™” është një kornizë origjinale pedagogjike dhe kërkimore, e krijuar, zhvilluar dhe hulumtuar në Shabani School of Music në Illinois, SHBA, në kontekstin e punës me nxënës të muzikës të moshës parauniversitare. E mbështetur në parimet e Action Research, kjo kornizë e koncepton mësuesin si praktikues-kërkues, i cili identifikon çështje pedagogjike, formulon pyetje kërkimore, planifikon ndërhyrje mësimore, mbledh dhe analizon evidencë mbi procesin e të nxënit dhe, mbi bazën e gjetjeve, reflekton dhe përshtat në mënyrë sistematike praktikën e tij pedagogjike.
Puna e Dr. Shabanit në këtë fushë ka tërhequr vëmendje profesionale në Amerikën e Veriut – në SHBA dhe Kanada – duke u prezantuar për dy vite radhazi në Summer Summit të Royal Conservatory of Music në Kanada, në aktivitete të Music Teachers National Association (MTNA), si dhe në MTNA GP3 Forum 2026 në College-Conservatory of Music të University of Cincinnati.
Tani, “The Reflective Studio™” do të prezantohet edhe në Evropë. Dr. Shabani do ta paraqesë atë në një “Spotlight Session” në Konferencën Vjetore 2026 të Young Music Talents in Europe (YMTE), nga 30 shtatori deri më 2 tetor, në Barratt Due Institute of Music në Oslo, Norvegji.
YMTE bashkon konservatorë muzikorë, shkolla të specializuara dhe institucione evropiane që zhvillojnë edukim muzikor të nivelit të lartë parauniversitar dhe përgatisin talentet e reja për vazhdimin e studimeve në institucionet e arsimit të lartë muzikor.
Pesha akademike dhe profesionale e këtij rrjeti reflektohet edhe në profilin e institucioneve anëtare, ndër të cilat janë Mozarteum University Pre-College (Salzburg, Austri), Royal Irish Academy of Music–Junior RIAM (Dublin, Irlandë), Reina Sofía (Madrid, Spanjë), Chetham’s School of Music (Manchester, Mbretëria e Bashkuar), School for Young Talent pranë Royal Conservatoire (Hagë, Holandë), Codarts (Rotterdam, Holandë), Wells Cathedral School (Wells, Mbretëria e Bashkuar), St Mary’s Music School (Edinburgh, Mbretëria e Bashkuar), Julius Stern Institute (Berlin, Gjermani), MDW Talent Lab (Vjenë, Austri), Folkwang Junior (Essen, Gjermani) dhe Barratt Due Institute of Music (Oslo, Norvegji).
Për Dr. Shabanin, prezantimi në Oslo do të përfaqësojë një etapë të re në zhvillimin ndërkombëtar të një pune kërkimore të nisur, zhvilluar dhe zbatuar gjatë viteve në Shabani School of Music. Për Kërçovën, ky është një lajm me domethënie të veçantë: një qasje origjinale në edukimin muzikor, e zhvilluar nga një bashkëvendës i saj në SHBA dhe e prezantuar profesionalisht në SHBA e Kanada, tani do të prezantohet edhe në një forum evropian të edukimit muzikor.
/kercova.net
