Putin i vjen në ndihmë Trumpit për Iranin?

Presidenti rus Vladimir Putin ka propozuar një zgjidhje konkrete për çështjen kryesore që ka bllokuar bisedimet e paqes mes Shteteve të Bashkuara dhe Iranit: programin bërthamor të Teheranit.

Duke folur me gazetarë ndërkombëtarë në Shën Petersburg, Putin tha se kontrolli mbi uraniumin e pasuruar të Iranit duhet t’i kalojë Agjencisë Ndërkombëtare të Energjisë Atomike (IAEA), organit mbikëqyrës bërthamor të Kombeve të Bashkuara.

“Uraniumi i Iranit mund të zhvendoset dhe të vihet nën kontrollin e IAEA-s. Nuk do të kishte problem, siç e shoh unë”, tha Putin, duke shtuar se mund të jetë i gabuar, por nuk e sheh se cili do të ishte problemi.

Udhëheqësi rus kujtoi rolin e Rusisë në arritjen e marrëveshjes bërthamore të vitit 2015 (JCPOA) gjatë presidencës së Barack Obamës dhe shprehu gatishmërinë që Moska të ndihmojë sërish në ndërmjetësim.

“Si SHBA-ja ashtu edhe Irani e dinë propozimin tim. Shpresoj që Rusia të mund të kontribuojë përsëri, pasi ne jemi miqësorë me Iranin”, tha ai.

Bisedimet mes Washingtonit dhe Teheranit kanë ngecur pikërisht te çështja bërthamore. Irani refuzon të heqë dorë nga uraniumi i pasuruar, ndërsa administrata Trump ka theksuar se hyri në konflikt për të parandaluar Teheranin të prodhojë armë bërthamore.

Propozimi i Putinit synon të krijojë një mekanizëm ndërkombëtar mbikëqyrjeje që mund të sigurojë palët e përfshira, duke ruajtur njëkohësisht të drejtën e Iranit për program energjetik bërthamor civil nën mbikëqyrje strikte.

/ts