Valbona Adili Emini:Për cilën gjuhë shqipe zyrtare e keni fjalën, z. Ali Ahmeti ?

Për gjuhën që nuk u bë kurrë realisht zyrtare në praktikë? Për gjuhën që nuk u përdor dhe nuk u respektua ashtu siç u premtua për vite me radhë?
Për cilët administratorë e keni fjalën? Për qytetarët e aftë dhe meritorë, apo vetëm për militantët partiakë? Për ata që punësoheshin me kritere profesionale, apo për ata që, sipas perceptimit të qytetarëve, vendet e punës i siguronin me ryshfet dhe lidhje partiake?

Fatkeqësisht, shumica e qytetarëve nuk e panë përfitimin që u premtohej. Shumë të rinj të shkolluar mbetën pa mundësi, ndërsa meritokracia u zëvendësua nga partiakëria. Askush nuk kërkonte privilegje, por vetëm atë që i takonte me dijen, punën dhe përkushtimin e tij.

Bilanci i asaj qeverisjeje të gjatë flet vetë. Nga viti 2001 deri në vitin 2024, mbi 17 mijë banorë të Kërçovës u larguan nga vendlindja e tyre. Vështirë të besohet se ikën nga mirëqenia, perspektiva dhe mundësitë.

Përkundrazi, largimi masiv është tregues i zhgënjimit, mungesës së shpresës dhe dështimit për të krijuar kushte që njerëzit të ndërtojnë jetën e tyre në vendin e vet.

Qytetarët nuk gjykojnë nga fjalët dhe premtimet, por nga rezultatet. Dhe rezultatet, për fat të keq, i shohim në valixhet e atyre që u detyruan të kërkojnë të ardhmen larg shtëpisë së tyre.

/ms