Orges Imeri, talenti nga Kërçova që po shkëlqen te Shkëndija U17

Kërçovari Orges Imeri po shndërrohet në një nga emrat më premtues të Shkëndijës U17.
Mesfushori i ri ishte ndër protagonistët kryesorë në fitoren 2:1 të kuqezinjve ndaj kampionit të Kosovës, 2 Korrikut, në një ndeshje miqësore të zhvilluar me ritëm të lartë dhe rivalitet të fortë.

Imeri e gjeti rrjetën dhe ishte një nga lojtarët që la gjurmë në këtë përballje, ndërsa golin tjetër për Shkëndijën e shënoi Ajet Rexhepi.
Nën drejtimin e trajnerit Taxhedin Kasami – Taki, Shkëndija U17 po ndërton një ekip me identitet të qartë loje, disiplinë taktike dhe mentalitet fitues. Besimi që trajneri po u jep talenteve të rinj po shfaqet edhe në paraqitjet e skuadrës në fushë.

Fitorja ndaj 2 Korrikut ishte një tjetër dëshmi se akademia e Shkëndijës po punon për të formuar një brez të ri futbollistësh me potencial të madh.
Në këtë grup të talentuar, Orges Imeri nga Kërçova po tërheq vëmendjen me paraqitjet dhe golat e tij, duke dhënë sinjale se mund të jetë një nga futbollistët që në të ardhmen do të kërkojë vendin e tij edhe në nivelet më të larta të futbollit.

Shkëndija U17 vazhdon të rritet, ndërsa talentet si Orges Imeri janë dëshmi se puna e vazhdueshme në akademi po sjell rezultate dhe po krijon shpresë për të ardhmen e futbollit kuqezi.

/tvgurra