Nuk është më Kërçova që e mbaj mend ! Shkruan Nevrij Ademi

Erdha në Kërçovë pas një kohe të gjatë. Hera e fundit që kisha qenë ishte në kohën e zgjedhjeve. Duke ecur nëpër qytet, nuk mund ta fsheh se u ndjeva keq.

Më goditën dy gjëra. E para, Kërçova që mbaja mend unë, një qytet me gjallëri, harmoni dhe plot rini, më dukej sikur kishte humbur atë shpirt. E dyta, gjendja e vetë kërçovarëve, që më la shumë për të menduar.

Në ato momente bëra një analizë me veten. Mendova për disa nga njerëzit që kanë lënë gjurmë në politikën e qytetit. Për një gjë jam i sigurt: asnjëherë nuk jam bërë pishman që nuk e kam mbështetur Fatmir Deharin dhe që e kam kritikuar gjatë gjithë fushatës. Koha, për mendimin tim, vetëm sa ma ka përforcuar atë bindje.

Sa i përket Shkodran Alilit, vazhdoj të kem dilema. Ende mendoj se është ndër djemtë më të mirë që ka nxjerrë Kërçova. A ka pasur një mision? Nuk e di. Nëse po, atëherë duhet pranuar se e ka realizuar me sukses, sepse arriti që me punën, idetë dhe vizionin e tij për Kërçovën të fitojë respekt dhe mbështetje te shumë njerëz.

Por mbi të gjitha, mendoj se Kërçova një ditë do t’i gjykojë të gjithë. Do të gjykojë Fatmir Deharin, Shkodran Alilin, Fatmir Limanin, e nëse duhet edhe Ali Ahmetin. Sepse qytetet nuk jetojnë për politikanët; politikanët kalojnë, ndërsa qyteti mbetet.

Dhe Kërçova meriton më shumë. Meriton të rikthejë gjallërinë, krenarinë dhe shpresën që dikur e karakterizonin. Meriton të jetë sërish qyteti për të cilin njerëzit flasin me dashuri e jo me keqardhje.

/ms