Ndahet nga jeta hoxha haxhi Xhevit Miftari. Ngushllime familjes
“Inna lillahi ve inna ilejhi raxhiun”
(Të Allahut jemi dhe tek Ai do të kthehemi)
Me dhimbje të thellë njoftojmë se ka ndërruar jetë hoxha haxhi Xhevit Miftari, i lindur më 02.01.1952, një shërbyes i përkushtuar i fesë, arsimit dhe komunitetit.
Fillimisht ai ka kryer shkollën e mesme islame – Medresenë “Alaudin” në Prishtinë, të cilën e përfundoi në vitin 1972. Më pas vazhdoi Shkollën e Lartë Pedagogjike, të cilën e kreu në vitin 1974. Po në atë vit, ai filloi punë në arsim, ku për 27 vite me radhë dha kontribut të çmuar në edukimin dhe formimin e shumë gjeneratave.
Gjatë jetës së tij, ai ka shërbyer me përkushtim si Imam, në shumë xhami dhe fshatra, ndër to: Berikovë, Zajaz Çelikaj, Reçan, Drugovë, Biçincë dhe Premkë, duke qenë gjithmonë pranë besimtarëve me fjalë të urta dhe udhëzime të sinqerta.
Përveç angazhimit fetar dhe arsimor, për një periudhë të gjatë ka qenë edhe kryetar i Bashkësisë Lokale në fshatin Shutovë (nga viti 1991 deri më 1998), ku ka dhënë një kontribut të madh në zhvillimin, organizimin dhe mbarëvajtjen e jetës në fshat dhe në komunitet.
Lusim Allahun e Madhëruar që ta mëshirojë, ta falë dhe ta shpërblejë me xhenetin Firdeus, ndërsa familjes, të afërmve dhe gjithë atyre që e njohën, t’u japë sabër dhe forcë në këto momente të vështira. Shkruajn nga Myftinia e BFI – Kërçovë në facebook
/ms
