Mjerim, shkollat po zbrazen në Maqedoni ?

Shkolla më e vjetër e mesme e bujqësisë në Manastir po shkon drejt boshatisjes së plotë, pasi në vitin e ri shkollor janë regjistruar vetëm tre nxënës, përcjell INA.

Ky numër rekord i ulët ka vënë në lëvizje autoritetet arsimore, pasi për shkak të mungesës ekstreme të interesit, këta tre nxënës tashmë do të detyrohen të ndryshojnë drejtimin dhe të regjistrohen në një tjetër profesion, duke bërë që paralelet e vitit të parë të mos hapen fare.

Lidhur me këtë situatë, Ministrja e Arsimit, Vesna Janevska, ka adresuar akuza të rënda drejt stafit të shkollës, duke deklaruar se mësimdhënësit nuk kanë qenë mjaftueshëm agjilë dhe kanë dështuar të tërheqin nxënës të rinj.

“Arsimtarët nuk u përpoqën të siguronin nëntëvjeçarë që do të mësonin në atë shkollë, e cila është më e vjetra dhe ka të regjistruar vetëm tre nxënës në vitin e parë, ndërkohë që bëhet fjalë për Pellagoninë ku bujqësia duhet të zhvillohet”, tha Janevska.

Ajo paralajmëroi se kjo situatë do të çojë në kalimin e këtij drejtimi dhe të mësimdhënësve në Qendrën Rajonale në Manastir.
“Ne nuk mund të lejojmë që të ekzistojë një paralele me vetëm tre nxënës. Ata do të vazhdojnë të punojnë me vitet e dyta, të treta dhe të katërta, ndërsa nga viti i ardhshëm drejtimi i bujqësisë do të kalojë në Qendrën Rajonale, ashtu siç edhe po planifikojmë”, u shpreh Janevska.

Sa i përket fëmijëve të regjistruar, ajo tha se ata do të duhet të zgjedhin një drejtim tjetër.

Sipas Janevskës, ky drejtim do të kalojë në Qendrën Rajonale, në të cilën, siç tha ajo, janë investuar shumë mjete. Atje do të transferohen edhe mësimdhënësit. Lidhur me ndërtesën, e cila është në pronësi shtetërore, do të vendoset plotësisht më pas se çfarë do të bëhet med të.

/(INA)