Mexhiti: Zullumit po i vjen fundi

Bashkëkryetari i VLEN-it, Izet Mexhiti, ka reaguar përmes një postimi publik lidhur me luftën kundër kredive të shpejta dhe industrisë së kumarit, duke theksuar se ky angazhim nuk ka qenë vetëm premtim elektoral, por një betim para qytetarëve, përcjell tetova1

Mexhiti ka theksuar se vendimi për heqjen e licencës së kompanisë “Credi Yes” dhe mbylljen e 40 filialeve të saj paraqet një sinjal të qartë se institucionet kanë nisur të veprojnë kundër, siç e quajti ai, një sistemi që ka rënduar jetën e qytetarëve dhe ka dëmtuar mijëra familje.

Ai paralajmëroi se këtë betejë do të tentojnë ta pengojnë grupe të fuqishme interesi, duke përmendur nëntokën dhe krimin e organizuar, por theksoi se nuk do të ketë tërheqje nga ky zotim.

Postimi i plotë:
“Rrënimi i perandorisë kredi–kumar–zhvatje ka filluar!
Lufta kundër kredive të shpejta dhe industrisë së kumarit nuk ka qenë slogan elektoral, as deklaratë për tituj mediatikë. Ka qenë zotim. Ka qenë betim para qytetarëve. Dhe sot, ky zotim po shndërrohet në veprim.

Dhe ketë luftë do mundohen ta pengojnë disa grupe të fuqishme interesi. Nga nëntoka, nga krimi i organizuar dhe nga ata që pasurohen mbi borxhin, dëshpërimin dhe hallin e familjeve. Por ta kenë të qartë, kjo luftë nuk ndalet! Dhe nga ky premtim nuk tërhiqemi asnjë hap!

Vendimi për heqjen e licencës së “Credi Yes” dhe mbylljen e 40 filialeve të saj është sinjal i qartë se koha e paprekshmërisë po merr fund. Është dëshmi se institucionet më në fund po veprojnë kundër një sistemi që për vite të tëra ka rënduar jetën e qytetarëve dhe ka goditur mijëra familje.

Të dashur qytetarë,
Zullumit po i vjen fundi. Sepse institucionet po veprojnë. Sepse shteti po iu përgjigjet atyre që kanë menduar se mund të sundojnë mbi hallin e njerëzve.

Ashtu siç jemi zotuar, unë dhe VLEN do të vazhdojmë të qëndrojmë në mbrojtje të qytetarëve. Kundër çdo forme të zhvatjes financiare. Kundër varësisë nga kumari. Kundër çdo skeme që i fut njerëzit në borxhe, pasiguri dhe dëshpërim.

Ky është angazhim i palëkundur. Është betejë për drejtësi. Dhe kjo betejë do të shkojë deri në fund”, ka përfunduar Mexhiti.

/tetova1.mk