Mexhiti: Po parandalojmë përhapjen e bixhozit

Me votimin e djeshëm të fazës së parë të ndryshimeve në Ligjin për lojërat e fatit në Kuvendin e Republikës së Maqedonisë së Veriut, jemi një hap më afër të njërit prej qëllimeve më të rëndësishëm që ua premtuam qytetarëve.

Me miratimin e fazës së parë të sjelljes së Ligjit për lojërat e fatit, fillon kufizimi i vërtetë institucional i lojërave të fatit, largimi i tyre nga fëmijët dhe shkollat, si dhe mbrojtja më e fortë e familjeve nga një dukuri që ka lënë pasoja të thella në shoqërinë tonë prej vitesh.

Ky është vetëm një ndryshim ligjor.
Por mbi të gjitha, është një detyrim njerëzor, familjar dhe moral ndaj popullit tonë.
Qëllimi i VLEN-it është i qartë: të vendoset rend, të parandalohet përhapja e pakontrolluar e bixhozit, të mbrohen të rinjtë dhe t’i jepet fund varfërimit të mijëra familjeve që kanë paguar çmimin e kësaj plage të shoqërisë prej vitesh.

Do t’i mbrojmë fëmijët tanë.
Do t’i mbrojmë familjet tona.
VLEN dha fjalën se kjo çështje nuk do të mbetet vetëm një premtim. Sot po dëshmojmë se fjalët shndërrohen në vepra.

Së shpejti presim të përfundojë plotësisht miratimi i Ligjit dhe të realizohet një nga premtimet më domethënëse, më humane dhe më të përgjegjshme nga ana e VLEN-it.

Vazhdojmë më punë, me përgjegjësi dhe me një qëllim të qartë: institucionet të jenë në anën e qytetarëve, fëmijëve dhe familjeve.

/ts