Moti ekstrem godet Italinë, dy gra humbin jetën !

Dy gra kanë humbur jetën si pasojë e motit ekstrem që ka përfshirë disa pjesë të Italisë.
Rasti më i fundit fatal është regjistruar mëngjesin e sotëm në Friuli, në verilindje të vendit, ku një grua humbi jetën pasi u mbyt në një kalim rrugor të përmbytur, ku kishte hyrë me automjetin e saj, përcjell albinfo.ch.

Ndërkohë, në Toskanë, një tjetër grua humbi jetën pas një tornadoje. Ajo ndodhej në apartamentin e saj dhe po përpiqej të mbyllte një dritare, kur xhami u thye nga fuqia e erës dhe e plagosi rëndë në qafë, duke i shkaktuar vdekjen.

Moti i keq ka shkaktuar dëme të konsiderueshme edhe në Romë. Dhjetëra automjete janë dëmtuar nga pemët e rrëzuara, ndërsa dy stacione qendrore të metrosë janë përmbytur si pasojë e reshjeve të dendura.

Situatë e rënduar është raportuar edhe në Asti, në rajonin e Piemontes, ku zjarrfikësit kanë pranuar rreth 70 thirrje për ndihmë. Ekipet e emergjencës kanë ndërhyrë, ndër të tjera, në apartamente në katet përdhese dhe në dyqane të prekura nga përmbytjet.

Autoritetet italiane kanë qëndruar në gatishmëri për shkak të përkeqësimit të kushteve atmosferike. Sipas parashikimeve, pas mesnatës pritet një përmirësim gradual i motit në pjesën më të madhe të vendit.

/Albinfo.ch