Mediat zvicerane i bëjnë jehonë heroit shqiptarë ! Hyri në veturën në flakë për të shpëtuar katër të rinj

Një aksident i rëndë në Wohlen të kantonit Aargau ka marrë vëmendje të gjerë në mediat zvicerane, pasi disa kalimtarë, në mesin e tyre edhe kosovari Ajdin Limoni, ndërhynë për të shpëtuar katër të rinj të bllokuar në një veturë që ishte përfshirë nga zjarri, transmeton albinfo.ch.

Ngjarja ndodhi të mërkurën, më 30 shtator, rreth orës 20:45 në Alte Bremgarterstrasse. Një Fiat Punto me katër persona brenda doli nga rruga në një kthesë dhe u përplas me një pemë. Pak çaste më vonë, vetura u përfshi plotësisht nga flakët.

Tele M1 ka raportuar gjerësisht për ndërhyrjen e 53-vjeçarit nga Kosova, i cili në momentin e aksidentit ndodhej duke kaluar pranë vendit të ngjarjes. Limoni ka treguar se fillimisht kishte parë një dritë të fortë dhe kishte menduar se mund të ishte duke u djegur ndonjë shkurre. Kur iu afrua, kuptoi se bëhej fjalë për një veturë të aksidentuar dhe njerëz të bllokuar brenda saj.

Sipas 20 Minuten, Limoni reagoi menjëherë dhe u afrua drejt automjetit, pavarësisht se flakët ishin shumë të mëdha. Ai ka treguar se brenda veturës pa tre persona pa vetëdije, ndërsa një vajzë ishte ende e vetëdijshme dhe kërkonte ndihmë. Sipas rrëfimit të tij, ajo i kishte thënë: “Më ndihmo, po vdes”.

Limoni u bëri thirrje edhe kalimtarëve të tjerë që të ndërhynin dhe të ndihmonin në nxjerrjen e të rinjve nga vetura. Për t’i liruar ata nga rripat e sigurimit, kërkoi edhe një thikë, ndërsa personat e shpëtuar u larguan sa më shpejt nga automjeti që po digjej.

Edhe Blick ka raportuar për momentet dramatike të shpëtimit dhe për rrezikun me të cilin u përballën ndihmësit e parë. Sipas raportimeve, Limoni dhe personat e tjerë që ndërhynë arritën t’i nxirrnin të katër të rinjtë nga vetura para se ajo të digjej tërësisht.

Gjatë ndërhyrjes, Limoni pësoi vetë djegie në duar dhe në ballë, për çka mori trajtim në spital. Ai ka thënë se në momentin e aksidentit nuk kishte menduar për rrezikun që po i kanosej, por vetëm për mënyrën se si mund t’i shpëtonte personat brenda veturës.

“Nuk mendova. Doja vetëm të ndihmoja dhe të shpëtoja”, ka treguar ai për 20 Minuten, duke shtuar se për të ka qenë veçanërisht e rëndë të shihte disa njerëz që qëndronin pranë vendit të aksidentit pa ndërhyrë.

Pas ngjarjes, Limoni ka bërë thirrje që njerëzit të mos kalojnë indiferentë pranë një aksidenti. Sipas tij, në raste të tilla duhet të ndalojnë dhe të kontrollojnë nëse ka persona që kanë nevojë për ndihmë, duke respektuar gjithmonë edhe sigurinë e tyre.

Në veturë ndodheshin një vajzë 17-vjeçare dhe tre të rinj të moshës 17, 18 dhe 21 vjeç. Të katër janë shtetas italianë me banim në Zvicër, transmeton tutje albinfo.ch.

Policia Kantonale e Aargaut ka konfirmuar se disa ndihmës të parë arritën t’i nxirrnin të katër personat nga automjeti para mbërritjes së ekipeve emergjente dhe se ndërhyrja e tyre ua kishte shpëtuar jetën.

Dy prej të rinjve pësuan lëndime shumë të rënda dhe u transportuan me helikopterë të Rega-s në spitalet universitare në Basel dhe Zürich. Dy të tjerët u dërguan me ambulanca në spital, me lëndime të shkallës mesatare deri në të rënda.

Njëri prej 18-vjeçarëve të plagosur rëndë ndodhet në gjendje serioze. Sipas familjes së tij, ai është vendosur në koma artificiale dhe pritet t’i nënshtrohet një operacioni të madh. Ai ka pësuar lëndime në kokë dhe fytyrë, si dhe fraktura në krah dhe këmbë.

Sipas Tele M1 dhe mediave të tjera zvicerane, policia ishte alarmuar fillimisht përmes sistemit automatik të njoftimit nga telefoni i njërit prej personave në veturë. Pajisja kishte regjistruar përplasjen dhe kishte dërguar sinjalin për një aksident të rëndë.

Kur ekipet emergjente arritën në vendngjarje, Fiat-i ishte përfshirë tashmë plotësisht nga zjarri. Megjithatë, të katër personat kishin arritur të nxirreshin jashtë nga ndihmësit e parë.

Ende nuk dihet se kush ishte duke e drejtuar automjetin dhe cilat ishin shkaqet e sakta të aksidentit. Policia po heton rrethanat e ngjarjes, ndërsa nuk përjashtohet as mundësia që shpejtësia ose shpërqendrimi gjatë vozitjes të kenë luajtur rol.

Zjarrfikësit ndërkohë arritën të parandalonin përhapjen e zjarrit në zonën pyjore përreth. Rruga ndërmjet Wohlenit dhe Bremgartenit u mbyll përkohësisht për shkak të intervenimit dhe hetimeve.

Rasti i Ajdin Limonit është pasqyruar nga disa media zvicerane, me fokus të veçantë te reagimi i tij dhe i ndihmësve të tjerë në minutat kritike pas aksidentit. Autoritetet zvicerane kanë vlerësuar se ndërhyrja e tyre e menjëhershme ishte vendimtare për nxjerrjen e katër të rinjve nga vetura që po digjej.

/Albinfo.ch