Mbi 10 orë pritje për të hyrë në Kroaci: mijëra mërgimtarë te bllokuar ?

Mbi 10 orë pritje për të hyrë në Kroaci: mijëra mërgimtarë përballen me një dramë të vërtetë. Ata kanë mbetur të bllokuar në vetura, shpesh pa ujë të mjaftueshëm dhe pa mundësi për të përdorur tualetin. Cilat janë alternativat për t’iu shmangur kolonës?

Siç njoftojnë mediat kroate, para pikës kuftare Karasovići – Debeli Brijeg është krijuar një kolonë prej rreth 20 kilometrash nga ana e Malit të Zi. Mijëra njerëz, mes tyre shumë mërgimtarë nga Kosova, presin për të hyrë në Kroaci dhe vazhduar rrugën për Zvicër, Gjermani, Austri e gjetiu. Sipas Autoklubit Kroat, udhëtarët po presin deri në 10 orë. Portali kroat Index.hr njofton se në bazë të informatave jozyrtare në kufi po pritet deri në 28 orë. Tepër e ngarkuar është edhe pika tjetër kufitare Kobila/Konfin. Edhe aty pritjet janë brutalisht të gjata.

Qarkullimi pothuaj është ndërprerë. Sipas mediave kroate, kolonat e gjata në pikat kufitare Debeli Brijeg dhe Konfin janë pasojë e rritjes së jashtëzakonshme të trafikut tranzit, procedurave të reja në kufi dhe kapaciteteve të kufizuara të vetë pikave të kalimit. Kanë mbetur të bllokuar edhe banorët e rajonit të Konavles të cilët kthehen nga puna, shkojnë në shtëpi apo përpiqen të kryejnë punët e përditshme.

Kryetari i Komunës së Konavles, Božo Lasić, paralajmëroi se zona është praktikisht e paralizuar. Ai theksoi se zyrtarët policorë po bëjnë përpjekje për të zbutur bllokimet, porse janë të kufizuar nga procedurat e reja kufitare, numri i korsive në dispozicion dhe kapaciteti i përgjithshëm i pikës kufitare.

Pritja me orë të tëra përbën një problem të veçantë për shkak të temperaturave të larta. Njerëzit mbeten të bllokuar në vetura, shpesh pa ujë të mjaftueshëm dhe pa mundësi për të përdorur tualetin, çka krijon një rrezik shtesë shëndetësor dhe sigurie. Për këtë arsye, është organizuar një kamion-cisterne me ujë të pijshëm për t’u ardhur në ndihmë udhëtarëve dhe banorëve të zonës që qëndrojnë me orë të tëra në kolona.

Lasić kërkoi nga institucionet kompetente masa urgjente dhe një organizim më të mirë të trafikut në kufi. Ai tha se mbrojtja e kufirit shtetëror dhe kontrollet e sigurisë duhet të mbeten prioritet, porse nuk duhet lejuar që banorët e Konavles të mbeten të shkëputur nga shtëpitë e tyre dhe të detyrohen të presin me orë të tëra në rrugë, megjithëse nuk po kalojnë fare kufirin. Për shkak të pritjeve me orë të tëra në pikën kufitare Karasovići dhe kolapsit të trafikut në Konavle, është aktivizuar Shtabi i Mbrojtjes Civile i Komunës së Konavles.

Një alternativë është udhëtimi nëpërmjet Bosnjës. Afër Hercegnovit, ku po presin shumica e mërgimtarëve nga viset shqiptare, gjenden dy pika kufitare: Sitnica / Zupci (në drejtim të Trebinjes) dhe Ilino Brdo / Klobuk (te Nikshiqi). Mediat malazeze kanë njoftuar se edhe në pikëkalimin Sitnica / Zupci janë regjistruar kolona të gjata, por gjendja nuk është aq dramatike sa në pikat kufitare me Kroacinë. Nëpër Bosnjë mund të kalojnë kosovarët me shtetësi të vendeve perëndimore. Ata me shtetësi të Kosovës duhet të kenë vizë. Në alternativë krejt tjetër është kthimi në Durrës dhe dalja me trajket në Bari, Brindisi apo Ancona të Italisë.

/ts