Maqedonia po “shuhet”, për një dekad 8.314 fëmijë më pak në bankat e klasës së parë !
Maqedonia po “shuhet”, për një dekad 8.314 fëmijë më pak në bankat e klasës së parë!
Në prag të 35 vjetorit të pavarësisë Maqedonia e Veriut ka më shumë arsye për t’u alarmuar sesa për të festuar. Sepse në mbi tre dekada, nga një qasje e politikave nacionaliste që janë burim i krizave, konflikteve e pasigurisë, shpopullimi është kthyer në kancerin shfarosës të popullatës të saj. Ku, vetëm brenda një viti të dhënat e Ministrisë së Arsimit thonë se kemi 3.000 fëmijë më pak që do ulen në bankat shkollore krahasuar me një vit më parë.
Ndërsa në 10 vite kemi 8.314 nxënës më pak. Pra nëse në vitin 2016, në bankat shkollore janë ulur 23.266 nxënës të klasës së parë, një dekadë më vonë, në vitin 2026 ky numër ka rënë në vetëm 14.952. Shifra pas të cilave nuk fshihen statistika, por në 10 vite janë 8.314 fëmijë më pak, mijëra familje që janë larguar, fshatra që po zbrazen dhe shkolla që po mbyllen. Ndërkoh sot në vendbanimet tona numërohen edhe 148 objekte shkollore të zbrazëta, kryesisht në zonat rurale nga të cilat 26 shkolla do të mbyllen.
Trend i cili nëse vazhdon me këtë ritëm rënja e nxënësve, vendi ynë pas një dekade rrezikon të ngelet me një numër të vogël simbolik të fëmijëve që do ulen për herë të parë në bankat e shkollave. Një këmbanë alarmi që paralajmron “shuarjen” e këtijë vendi.
Sepse, shpopullimi nuk është një fenomen që ndodhi brenda natës. Por, ai është rezultat i 35 viteve të keq qeverisjes, izolimit, mungesës së integrimit, të drejtësisë e të pasigurisë ekonomike e cila ul natalitetin dhe largon të rinjët në masë të madhe nga vendi. Ku fajtori kryesor padyshim mban emrin POLITIKË. E cila ushqen ndasi, diskriminim etnik, pabarazi, izolim e retorik boshe patriotike përmes të cilës synojnë pushtetin për abuzim por jo qeverisjen për të ndërtuar politika progresive për të ardhmen e qytetarëve.
E ndërsa politika lufton vetëm për pushtet, të rinjtë largohen, familjet emigrojnë, nataliteti bie dhe bankat e shkollave mbeten bosh. Një fenomen gllabërues që po e zbraz vendin dhe që rrezikon seriozisht të ardhmen e tij!
Shkruan Bekim Adili.
/tvgurra
