Maqedonia ndërton apartamente për një popull që po ikën prej aty ?

Ndërsa të rinjtë largohen dhe familjet hyjnë në borxhe për të blerë një banesë, Maqedonia vazhdon të ndërtojë me ritme marramendëse.
Nga viti 2020 deri më 2025 janë ndërtuar 36.281 apartamente të reja. Megjithatë, 307.187 banesa, ose 36,6% e fondit të përgjithshëm, janë bosh. Pra, më shumë se çdo apartament i tretë nuk ka banor.

Për kë po ndërtohen gjithë këto ndërtesa?
Betoni rritet, popullsia pakësohet
Parqet dhe hapësirat e gjelbra zhduken, trafiku rëndohet dhe qytetet zgjerohen pa një vizion të qartë. Ndërkohë, të rinjtë largohen, familjet shtyjnë krijimin e familjes dhe pagat nuk e ndjekin rritjen e çmimeve.

Megjithatë, vinçat nuk ndalen.
Apartamenti nuk është më vetëm shtëpi, por është kthyer në investim dhe mjet për ruajtjen e kapitalit. Ndërsa qytetari me pagë mesatare e sheh banesën gjithnjë e më të paarritshme.
Në gjysmën e parë të vitit 2026, çmimi mesatar i kërkuar në Shkup arriti rreth 2.156 euro për metër katror, me një rritje vjetore prej 25%. Në Qendër të Shkupit, një apartament prej 50 metrash katrorë u shit për 168.000 euro, ose 3.360 euro për metër katror.

Edhe Ohri po betonizohet. Apartamentet atje ofrohen me çmime deri në 3.200 euro për metër katror.
Sa më shumë beton, aq më pak hapësirë. Sa më shumë apartamente, aq më pak mundësi për t’i blerë.

Natën, shumë komplekse të reja mbeten me dritare të errëta: ndërtesa të mëdha, por pak jetë. Ndërkohë mungojnë shkollat, kopshtet, parkingjet, rrugët dhe hapësirat publike.
Ky është paradoksi i Maqedonisë së sotme: po ndërtojmë qytete për njerëz që po largohen dhe banesa që nuk mund t’i përballojnë ata që jetojnë këtu.
Nëse ky trend vazhdon, mund të kemi mijëra apartamente dhe qindra komplekse moderne, por të na mungojë ajo që është më e rëndësishme: njerëzit.

/lajmpress