Maqedoni mungojnë më së shumti kamarierë !

Në vend po ndihet mungesë e theksuar e fuqisë punëtore në sektorin e hotelerisë, veçanërisht e kamarierëve, pasi shumë prej tyre janë larguar për punë sezonale në Kroaci, të tërhequr nga pagat më të larta.

Ka interesim të madh për Ligjin për angazhim në punë, ndërsa Ministria e Ekonomisë dhe Punës po vazhdon me takime informative në të gjitha rajonet për të sqaruar përfitimet e tij, deklaron zëvendësministri Marjan Risteski.

“Pjesëmarrja në këto takime është shumë e lartë. Synimi ynë është të informojmë dhe të motivojmë të gjithë të interesuarit nga sektorë të ndryshëm si bujqësia, hoteleria dhe shërbimet. Më pas, Inspektorati Shtetëror i Punës do të fillojë zbatimin e ligjit në praktikë”, thekson Risteski.

Sipas tij, në Agjencinë e Punësimit janë nënshkruar dhjetëra kontrata, kryesisht në sektorin e hotelerisë, megjithëse numri i aplikimeve mbetet ende i ulët. Ai shton se çdo pjesë e ligjit që rezulton jopraktike do të shqyrtohet për ndryshime të mundshme.

“Ky ligj është pjesë e reformave që lidhen me integrimin evropian dhe luftimin e ekonomisë informale. Çdo pengesë në zbatimin e tij do të identifikohet dhe, nëse është e nevojshme, do të bëhen përmirësime”, shton ai.

Ndërkohë, në Prilep mungesa e fuqisë punëtore në hoteleri arrin rreth 30 për qind. Kjo situatë lidhet kryesisht me largimin e punëtorëve sezonalë jashtë vendit, sidomos në Kroaci. Pritet që një pjesë e vendeve të punës të plotësohen nga të rinjtë dhe studentët, ndërsa do të kërkohen edhe punëtorë të rinj për profesionet deficitare.

“Mungesa e stafit është evidente. Na mungojnë kamarierë, banakierë, kuzhinierë dhe picaiolo. Do të shfrytëzojmë mundësitë që ofron ligji i ri dhe presim përfundimin e vitit shkollor nga nxënësit dhe studentët, kryesisht për pozitat e kamarierëve dhe banakierëve. Për profesionet e tjera, do të kërkojmë edhe te të papunët apo pensionistët”, deklaron Jordanço Momirovski nga shoqata e hotelierëve “Meançii” në Prilep.

Në këtë qytet operojnë rreth 90 objekte hoteliere me mbi 800 të punësuar.
Ligji për angazhim në punë, që ka hyrë në fuqi nga 1 janari, mundëson punësimin sezonal në sektorë si hoteleria, bujqësia dhe shërbimet. Ai përfshin të rinjtë, të papunët, pensionistët dhe kategoritë sociale, të cilët mund të regjistrohen dhe të sigurojnë të ardhura shtesë pa humbur përfitimet ekzistuese.

/ts