Lajm i keq për mërgimtarët, do të rritet dukshëm çmimi i cigarëve në Gjermani ?

Cigaret në Gjermani mund të pësojnë një rritje të madhe të çmimit në vitet e ardhshme. Ministria Federale e Financave po planifikon një rritje graduale të taksave mbi duhanin, raportoi agjencia gjermane e lajmeve DPA.

Sipas një projektligji të siguruar nga agjencia, çmimi mesatar i një pakete me 20 cigare mund të rritet nga rreth 8,80 euro në vitin 2027 në afërsisht 11,40 euro deri në vitin 2030.
Në kuadër të këtyre ndryshimeve, pjesa e taksës në çmimin me pakicë do të rritet nga rreth 4,40 euro në 5,75 euro për paketë. Rritjet e planifikuara do të përfshijnë edhe të gjitha produktet e tjera të duhanit në treg.

Ministria gjermane e Financave thekson se qëllimi kryesor i kësaj mase është mbrojtja e shëndetit publik.
“Propozimi do të shërbejë për mbrojtjen e shëndetit publik dhe është në përputhje me synimin për të ulur nivelin e duhanpirjes tek të rinjtë dhe të rriturit”, deklaroi një zëdhënës i Ministrisë, duke shtuar se rritja e të ardhurave shtetërore është një element i rëndësishëm në konsolidimin e financave publike.

Me këtë hap, Berlini pret të arkëtojë miliarda euro shtesë në buxhetin shtetëror. Të ardhurat shtesë nga taksat parashikohen të jenë:
756 milionë euro në vitin 2027
1,6 miliardë euro në vitin 2028
2,5 miliardë euro në vitin 2029
3,6 miliardë euro në vitin 2030

Ndërkohë, produktet e duhanit në Gjermani ende konsiderohen relativisht të lira krahasuar me disa vende të Evropës Perëndimore. Sipas të dhënave të Shoqatës Gjermane të Cigareve, një paketë me 20 cigare kushtonte mesatarisht 7,33 euro.

/ts