Kurtishi: Pas gati një dekade, Posta e Maqedonisë pajiset me automjete të reja në Ohër dhe Kërçovë

Drejtori i përgjithshëm i Postës së Maqedonisë, Orhan Kurtishi, ka njoftuar se janë dorëzuar automjete të reja për nevojat e njësive rajonale të Postës në Ohër dhe Kërçovë.

Sipas Kurtishit, investimi përfshin gjashtë automjete të reja për Njësinë Rajonale të Ohrit dhe tre automjete për Njësinë Rajonale të Kërçovës, me qëllim përmirësimin e shërbimeve postare dhe rritjen e efikasitetit në punë.

“Sot, në Njësitë Rajonale të Postës së Ohrit dhe Kërçovës, realizuam dorëzimin e automjeteve të reja për shërbimet postare”, ka bërë të ditur Kurtishi.

Ai theksoi se bëhet fjalë për një investim të rëndësishëm, i cili sipas tij ka munguar për afro dhjetë vjet.
“Gjashtë automjete të reja për Ohrin dhe tri për Kërçovën, për të dy njësitë rajonale, përfaqësojnë një investim të rëndësishëm, i cili kishte munguar për gati 10 vite”, deklaroi drejtori i përgjithshëm i Postës.

Kurtishi shtoi se institucioni do të vazhdojë të investojë në modernizimin e kapaciteteve dhe përmirësimin e shërbimeve për qytetarët.
“Vazhdojmë të punojmë me dinjitet dhe përgjegjësi, në shërbim të qytetarëve dhe zhvillimit të institucionit tonë”, u shpreh ai.

/alfax.mk