Kujtim Kasami ngre shqetësimin për mungesën e mediave në takimin me ambasadorin e Këshillit të Evropës

Gjatë vizitës së sotme në Komunën e Kërçovës të ambasadorit të Këshillit të Evropës, këshilltari komunal Kujtim Kasami ngriti publikisht shqetësimin për mungesën e mediave lokale në këtë aktivitet.

Takimi u hap nga kryesuesi i Këshillit Komunal, Ajhan Sulkovski, ndërsa më pas të pranishmëve iu drejtua me një fjalim ambasadori i Këshillit të Evropës.
Menjëherë pas tij, fjalën e mori këshilltari Kujtim Kasami, i cili fillimisht e përshëndeti ambasadorin, i uroi mirëseardhje dhe e falënderoi për vizitën në Kërçovë. Më pas ai ngriti një çështje që, sipas tij, është përsëritur disa herë.

“Në këtë sallë nuk shoh asnjë medium, sidomos mediat që veprojnë në Komunën tonë. Qytetarët duhet të informohen për takime të këtij niveli. Kjo është një lëshim i vazhdueshëm i komunës. Edhe para disa ditësh, gjatë vizitës së përfaqësuesve të Ambasadës së Zvicrës, mediat nuk u ftuan”, theksoi Kasami.

Ai shtoi se transparenca dhe informimi i qytetarëve duhet të jenë pjesë e çdo aktiviteti institucional, veçanërisht kur bëhet fjalë për vizita të përfaqësuesve ndërkombëtarë në Komunën e Kërçovës.

/tvgurra