Euroambasadori Michalis Rokas në Vizitë Zyrtare në Komunën e Kërçovës

Komuna e Kërçovës sot pati nderin të jetë nikoqire e Ambasadorit të Bashkimit Evropian në Republikën e Maqedonisë, Michalis Rokas, i cili qëndroi për vizitë zyrtare në komunën tonë.

Euroambasadori Rokas u prit nga Kryetari i Komunës së Kërçovës, Dr. Aleksandar Jovanovski, pas së cilës u zhvillua një takim pune i frytshëm dhe konstruktiv, në frymën e respektit të ndërsjellë, partneritetit dhe përkushtimit të përbashkët ndaj vlerave evropiane.

Gjatë bisedimeve u shkëmbyen mendime për rëndësinë e vetëqeverisjes lokale në procesin e integrimit evropian, për mundësitë e avancimit të mëtejshëm të bashkëpunimit me institucionet e Bashkimit Evropian, si dhe për rëndësinë e krijimit të politikave të qëndrueshme, të orientuara drejt përmirësimit të cilësisë së jetës së qytetarëve.

Kryetari i Komunës theksoi përkushtimin e Komunës së Kërçovës ndaj qeverisjes transparente dhe të përgjegjshme, avancimit të shërbimeve komunale, nxitjes së zhvillimit ekonomik lokal dhe krijimit të një komune bashkëkohore, funksionale dhe gjithëpërfshirëse.

Njëkohësisht, u theksua se mbështetja, përvoja dhe partneriteti me Bashkimin Evropian janë me rëndësi të jashtëzakonshme për realizimin e projekteve që kontribuojnë në përmirësimin e infrastrukturës, mbrojtjen e mjedisit jetësor, digjitalizimin, zhvillimin ekonomik, kohezionin social dhe krijimin e mundësive të barabarta për të gjithë qytetarët.

Në kuadër të vizitës zyrtare, euroambasadori Michalis Rokas zhvilloi takim dhe bisedë me Kryetarin e Këshillit të Komunës së Kërçovës dhe me këshilltarët komunalë, gjatë së cilës u shqyrtuan çështje që lidhen me funksionimin e demokracisë lokale, rolin e Këshillit në miratimin e vendimeve në interes të qytetarëve dhe rëndësinë e dialogut konstruktiv ndërmjet të gjithë faktorëve politikë dhe shoqërorë.

Takimi paraqiti një mundësi për shkëmbim të hapur të qëndrimeve dhe përvojave, si dhe për konfirmimin e përcaktimit të përbashkët për forcimin e proceseve demokratike, bashkëpunimit institucional, transparencës dhe pjesëmarrjes aktive të qytetarëve në krijimin e politikave lokale.
Komuna e Kërçovës e vlerëson vizitën e euroambasadorit Michalis Rokas si një kontribut të rëndësishëm në avancimin e bashkëpunimit dhe thellimin e marrëdhënieve me Delegacionin e Bashkimit Evropian.

Njëkohësisht, vizita paraqet konfirmim se bashkësitë lokale kanë një rol të rëndësishëm në procesin evropian dhe se, përmes partneritetit, dialogut dhe punës së përbashkët, mund të krijohen përfitime konkrete për qytetarët.

Komuna e Kërçovës edhe në të ardhmen do të vazhdojë të jetë një partner i hapur, i besueshëm dhe konstruktiv në të gjitha iniciativat e orientuara drejt zhvillimit evropian, forcimit institucional, përparimit demokratik dhe një të ardhmeje më të mirë për të gjithë qytetarët.

E falënderojmë euroambasadorin Michalis Rokas për vizitën zyrtare, dialogun e sinqertë dhe të hapur, si dhe për mbështetjen dhe interesimin e treguar për zhvillimin e Komunës së Kërçovës.

Jemi të bindur se kjo vizitë do të paraqesë një nxitje shtesë për thellimin e bashkëpunimit dhe realizimin e iniciativave dhe projekteve të reja të përbashkëta, në interes të Kërçovës dhe qytetarëve të saj.

/ms