Këto janë të gjitha paditë ndaj Fatmir Deharit deri tash ?

Policia e Maqedonisë së Veriut ka ngritur një kallëzim të ri penal ndaj ish-kryetarit të Komunës së Kërçovës, Fatmir Dehari, për keqpërdorim të detyrës. I akuzuari i dytë ishte kryetar i Komisionit për zbatimin e procedurës së partneritetit publik-privat, transmeton Portalb.mk.

“kallëzim penal në Prokurorinë Themelore Publike në Kërçovë kundër F.D. (51) nga Kërçova për shkak të ekzistimit të dyshimit të bazuar se ka kryer veprën penale të vazhduar keqpërdorim i detyrës zyrtare, si dhe kundër personit B.K. (46) nga Kërçova për shkak të dyshimit të bazuar se ka kryer veprën penale punë e pandërgjegjshme në detyrë“, raportoi Policia e Maqedonisë së Veriut.

Këto vepra penale janë të dënueshme në bazë të nenit 353 nga Kodi Penal. Ata akuzohen se në periudhën 2021-2025 kanë favorizuar kompani për modernizimin e ndriçimit publik. Dehari dyshohet se e ka dëmtuar buxhetin me 1.6 milionë euro.

“Ka ndërmarrë veprime të kundërligjshme me qëllim që kontrata për modernizimin e ndriçimit rrugor në qytetin e Kërçovës t’u jepet personave të afërt me të, me synimin për përfitimin pasuror në mënyrë të kundërligjshme në përmasa të mëdha”, raportoi Policia.

Ky është kallëzimi i gjashtë penal kundër Fatmir Deharit si kryetar komune në më pak se një vit.
Më 26 shkurt, MPB ngriti kallëzim penal kundër Deharit për keqpërdorim të 1.4 milionë denarëve.

Më 29 janar 2026, MPB ngriti kallëzim penal kundër Deharit për keqpërdorim të detyrës dhe larje parash, me çka e ka dëmtuar buxhetin e komunës 130 mijë euro.
Më 4 maj 2025 MPB ngriti kallëzim penal kundër Deharit për keqpërdorim të pozitës zyrtare duke dëmtuar buxhetin komunal me 4 milionë denarë.

Më 29 korrik 2025 MPB ngriti kallëzim ndaj Deharit pasi lejoi ngritjen e një deponie mbeturinash të paligjshme.
Më 25 nëntor 2025 MPB ngriti kallëzim ndaj Deharit për kryerjen e veprës penale “punë e pandërgjegjshme në detyrë”.

Kujtojmë se Dehari ri-kandidoi për kryetar të komunës së Kërçovës në zgjedhjet lokale 2025, por humbi nga kandidati i VMRO-së. Gjatë fushatës zgjedhore, ai u përmend në skandalin me materiale të përgjuara ku dëgjohet një zë i cili thuhet të jetë Dehari, të cilat janë me përmbajtje eksplicite, seksuale, korruptive, ofendime, sharje dhe të tjera.

/portalb.mk