Irani rrëzon helikopterin amerikan! Trump kërcënon me reagim të ashpër!

Një helikopter amerikan AH-64 Apache është rrëzuar në Ngushticën e Hormuzit gjatë një misioni patrullimi, ndërsa rreth incidentit po qarkullojnë versione të ndryshme që kanë ngritur pikëpyetje mbi shkaqet e ngjarjes.

Presidenti i Shteteve të Bashkuara, Donald Trump, deklaroi se forcat iraniane rrëzuan helikopterin amerikan gjatë patrullimit në një nga korridoret më të rëndësishme detare në botë.

Postimi i Trump në X
Megjithatë, informacione të reja të publikuara nga gazetari Barak Ravid i Channel 12 dhe Axios, duke cituar një zyrtar amerikan, sugjerojnë se helikopteri mund të jetë goditur nga një dron iranian gjatë fluturimit. Sipas këtij burimi, përplasja me mjetin ajror pa pilot shkaktoi rrëzimin e Apache-s.

Një burim tjetër i njohur me incidentin tha se droni i përfshirë mund të ketë qenë i tipit iranian “Shahed”. Deri tani nuk është sqaruar nëse përplasja ka qenë e qëllimshme apo aksidentale.
Komanda Qendrore e Forcave të Armatosura Amerikane (CENTCOM) konfirmoi se helikopteri u rrëzua pranë brigjeve të Omanit gjatë një patrullimi rutinë.

Ndërsa një dron sipërfaqësor i Marinës së Shteteve të Bashkuara lokalizoi dhe shpëtoi dy anëtarët e ekuipazhit.
Komanda Qendrore e SHBA-së bëri të ditur se operacioni i shpëtimit u realizua nga një mjet detar pa pilot i Task Forcës 59 të Flotës së Pestë Amerikane.

“Një dron sipërfaqësor i Marinës amerikane gjeti dhe shpëtoi ekuipazhin nga uji. Task Forca 59 është njësia e parë operative e Marinës së SHBA-së e dedikuar inteligjencës artificiale dhe sistemeve pa pilot”,deklaroi zëdhënësi i CENTCOM-it, kapiteni Timothy Hawkins.

Sipas ushtrisë amerikane, dy ushtarakët u shpëtuan brenda afërsisht dy orësh nga momenti i rrëzimit dhe ndodhen në gjendje të qëndrueshme shëndetësore.
“Ushtarët u shpëtuan në mënyrë të sigurt dhe janë në gjendje të qëndrueshme. Shkaku i incidentit mbetet nën hetim”, thuhet në deklaratën e publikuar nga CENTCOM në platformën X.

Task Forca 59, e krijuar në vitin 2021, përbëhet nga mjete detare dhe ajrore pa pilot dhe konsiderohet një nga projektet më të avancuara të Marinës amerikane për integrimin e inteligjencës artificiale në operacionet ushtarake.

Ngjarja shënon humbjen e parë të një helikopteri Apache që nga fillimi i konfliktit aktual mes SHBA-së dhe Iranit. Helikopterët AH-64 Apache përdoren për sulme precize, mbështetje ajrore dhe misione zbulimi, ndërsa gjatë javëve të fundit janë angazhuar edhe kundër mjeteve të vogla detare iraniane në Gjirin Persik.

Autoritetet amerikane kanë nisur një hetim për të përcaktuar rrethanat e sakta të incidentit. Deri në publikimin e rezultateve zyrtare, mbetet e paqartë nëse helikopteri u rrëzua si rezultat i një sulmi të drejtpërdrejtë, një përplasjeje aksidentale me dronin apo për shkaqe të tjera operative.

/ts